Shillong, March 12: Meghalaya Energy Corporation Limited (MeECL)-o contract-na kam ka•giparangkode a•dokni Job Reservation Policy-o pangchake seokja ine Sukrobar salo, Meghalaya a•dokni Power Minister James PK Sangma talatangaha.
Power Minister-ni parakatani gitade, MeECL-o contract-na kam ka•giparangko bilsisanasan rakkiengani gimin skangonin MeECL-o a•dokni job reservation policy-ko ja•rikjahachim.
MeECL-o dingtang dingtang kamrangna manderangko rakkiani bidingo Congress dolni MLA Zenith Sangma-ni Assembly-o sing•anina aganchakaniko on•angengon, dingtang dingtang kamrango dakchake on•na gita Khasi, Jaintia aro Ri Bhoi a•jarango gimik sak 128 manderangko, MeECL rakkiaha ine Power Minister parakataha.
Khasi, Jaintia aro Ri Bhoi a•jarangosan dingtang dingtang kamrangko ka•na gita seokaiahama ine Mawsynram-ni sakgipin Congress MLA HM Shangpliang-ni sing•anina aganchakaniko on•angskaengon, kamrangko on•anide MeECL aro MeECL-ko chalaienggipa manderangni jakosa ong•a ine Power Minister parakataha.
