Shillong, June 28: Meghalaya Energy Corporation Limited (MeECL)-o tangka jakkalsretani aro ong·gija dakanirangko jakgitele am·sandina man·na gita bakan sorkari, u·iataniko on·angna siengaha.

“MeECL-o ong·gija dakanirangko am·sandina gita inquiry commission-ko songmanaha aro iani bidingo u·iataniko on·china ge·etanirangkoba on·atmanaha,” ine Sombar salo a·dokni Chief Minister Conrad K Sangma, kobor ra·timgiparangna parakataha.

Ia u·iatani da·al walni bakon ong·jaode knal pringo ong·katnaba gnang ineba Chief Minister parakataha.

Da·o dipet inquiry-ko dakani bidingo u·iataniko on·kujaengani gimin commission-ni membor-rangko jinmana parakaniara niamo ong·jawa ineba Chief Minister parakataha.
Indake ong·genchimoba, ia commission jakgitele kamko ka·bebena man·na gita cholko on·na sorkari jotton ka·gen ine Chief Minister parakataha.

Ia commission-o a·dok sorkari, power department aro gipin department-rango bak donggipa manderangkode sorkari man·chapatjaha ineba Chief Minister talatangaha.

“Batanggimin somoirango MeECL ba gipin department-rango kam ka·gipa manderangko chinga rimnapgenchim ong·ode ia inquiry-ko dakanio jakgitelaniko manderang sing·dopangpilgenchim. Uni gimin chinga ia niamrangko ja·rikaha,” ine Sangma aganaha.