Shillong, May 10: MeECL-o ong·gija kamrangni bidingo matnanganiko jakgitele sandirokatchina sorkarini ge·etaniko on·anggipao Byrnihat Industrial area-na dingtangmancha kajina gamna on·aniko aro bijoli cha·uanikoba sandiatangjolgen.
Jakgitele sandirokataniko namnikpae Sombar salo kobor ra·timgiparangna aganengon, sandirokatanichi MeECL-o kam ka·ani chu·gimikkon roktok ma·sie ra·angna man·gen ine Meghalaya a·dokni Power Minister Pa James Sangma parakakataha.
Matnanggimin gita pilak ong·gija kamrang ong·enganiko aro niamrangko tik ong·e ja·rikatjaenganirangko ja·pangoni namedake sandianiko dakanggen ineba ua u·iataha.
Pa Sangma-ni janapatkuani gita, jakgitele sandirokataniko kamoni neng·takgimin judge-chi dilgen aro chu·gimik sandirokatanio ma·mong sorkarini on·atgipa scheme-rang jekai Saubhagya scheme, Smart Meters aro DDUGKY, iarang baksana corporation-o mandetangna mikkang nie dakani, kamna mande rim·ani aro kam ra·doatani pilakkon sandiatangjolgen.
Sandiataniko sachi dakdilgen iako sorkari da·odipet tik ka·kuja aro sandiatani kamna terms of reference-koba tarimanaha.
Sandirokate man·gimino pangchake jeba tik ong·gijagipa officialrang sorkarini niamo pangchake sastiko man·gen ineba Power Minister talatjolaha.
Mija antio, a·dokni skotong minister Pa Conrad Sangma, MeECL-o kamrang tik ong·gijaniko jakgitele sandiatchina gita ge·etaniko on·angahachim, jekon kamoni neng·takgimin judge-chi dilgen aro unbaksa gipin memborrangna saksa kamoni neng·takgimin sorkari officer aro technical background-oni sakgipinko mingsoaha.
Indake ong·engon, mamlako matchote sandiatna sorkari somoikoba on·gen jean ja-bri aro ja-dokrang ong·naba gnang ine janapataha.
Iana skang, MeECL-o kam ka·enggiparang aro United Democratic Party (UDP), jean da·o a·doko sorkariko bakrime rikanio bak dongpagipa ong·a uamang, Corporation-o kamrang tik ong·gijanirangko jakgitele sandiatchina dabiangtokahachim.
