Shillong, May 5: Meghalaya Energy Corporation Limited (MeECL)-o tik ong·gijanirang donga ingipako jakgitele sandirokatchina ge·etaniko on·aha ine Meghalaya a·dokni skotong minister Pa Conrad K. Sangma, Butbar salo u·iataha.
Jakgitele sandirokataniko, kamoni neng·takgimin Judge-chi dilgen jeon sakgni gipin memborrangba donggen ine Pa Sangma u·iataha.
MeECL-o cha·bokani aro kam tik ong·gijanirang donga ine matnanganirangko jakgitele sandirokatchina anga mijalo ge·etaniko on·angaha ine Pa Sangma parakaha.
Iana da·odipet committee-ko songa dongkujaoba Pa Sangma iako sandirokatchina ge·etaha. Committee-ni sakgni gipin memborrangara kamoni neng·takgimin administration-oni saksa aro sakgipinara technical background-oni ong·gen.
Sandirokatna dongiminni ning·o, Ma·mong aro a·dokni scheme-rangoniko MeECL-oni dingtang dingtang dakgipa tender on·anirangko man·chapgen. Mandeni bilrango nangchapgipa mamlarang jekai manderangko kamo rakkiani aro kam ka·giparangni gita ong·gipa gipin tik ong·gijanirangkoba nianggen. Bijolirangko cha·ue jakkalani gimin matnanganiko aro maini a·sel AT&C-o gimaanirang dongenga uarangkoba nianggen. Unbaksana, batanggimin bilsi 10 rangni gisepo ong·bagimin, chong·motan MeECL-ko a·bachengataoni gimikkon ia sandirokatanio man·chapjolgen.
“Jakgitele sandirokatna gita jabri ba jadok somoirangko chinga committee-na on·gen. Iana tik ong·gipa somoini gimin niroke political department kamko ka·anggen, indiba sandirokataniko man·adipet gong·raken dakatchina anga ge·etaniko on·manaha,” ine Pa Sangma talataha.
Bang·gija salrangni gisepon Committee-ko songgen, indake ong·oba, kamde a·bachengengaha ineba skotong minister u·iatjolaha.
