Shillong, May 16: Meghalaya a·dok, 2027 bilsioni February-March jao a·dokni bilsi 55 gapaniko manian baksana India-ni National Games-ko sokachakgen, jenan dingtang dingtang biaprango sokachakna gita tarisamsoanirangkoba a·bachengengaha.
Ma·mong sorkarini pilak a·dokrangkon bak man·atpana tik ka·gimin gita Meghalaya a·dok mongsonggipa sokachakgipa ong·genchim ong·oba, Salgro Salaram jolni a·dok ge·antion mingsa kal·susaaniko sokachakna man·gen ine Warjri aganangaha.
Dingtang dingtang a·dokrango kal·susaanirangko soka chakna miksonganiara, Meghalaya a·doko kal·chakram biaprang chu·ongja ong·ja, indiba badiaba kal·susaanirangna dingtangmancha namgnirangko on·a nanggipa biaprangko nanga jean da·o a·doko dongkuja inenba Sports Minister Shakliar Warjri talate on·angaha. Bang·bata rika cho·ani kamrangan matchotaha aro mitamrangko Games-ko ong·atna skang matchotatgen ineba ua agandapangkuaha.
Da·o minggni ka·enggipa mongsonggipa project-rangara, JN Stadium-ni ki·sango rikenggipa Indoor Stadium aro Mawkhanu-o rikenggipa Football Stadium ong·a, jekon Skotong Minister Conrad K Sangma-ba State budget-o janapataha. Nangchongmota ong·ode Sports Authority of India (SAI) biaprangkoba jakkalangnaba donga ineba ua janapataha.
A·dok sorkari somoi gita pilak kamrangkon matchotatna ka·dongsoan baksana 2027 bilsini National Games-ko, Meghalaya a·dokna aro Salgro Salaram jolna chu·sokgipa aro mikkim gnanggipa kal·susaani ong·atna chu·gimik on·kange kamrangko ka·enga ineba Sports Minister aganangaha.
Na·simang ia video-koba nina man·gen:
Na·simang iakoba poraina man·gen: World No Tobacco Day-ni bak gita skulrang re•jomaniko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
