Guwahati, Mar 9: Sonibar salo, Salgro salaram-ni dal•batsranggipa project, Viksit Bharat Viksit North East Program-ko Itanagar aro Arunachal Pradesh-o ong•atangan baksana a•songo General Election-ko ong•atani bidingo parakatengon, Prime Minister Narendra Modi, Manipur, Meghalaya, Nagaland, Sikkim, Tripura aro Arunachal Pradesh a•dokni namroro silroroanina gong crore 55,600 damni project-rangna pangchakaniko songe on•angaha.
Indake, Prime Minister, Arunachal Pradesh-ni Sela Tunnel-ko a•songni manderangna parakatan baksa, gong crore 10,000 damni UNNATI scheme-koba a•bachengate on•angaha.
Ia project-rangara, rail rama, sorok, health, nok rikani, education, sima ario rika cho•ani kamrang, IT, bijoli, Oil aro Gas sector-rangna ong•achim.
Indake, ia on•gimin project-rangoni, Meghalaya a•dokni silroro namroroanina on•enggipa project-ara, gong Crore 290 damni ong•achim, jekon, Tura-o IT Park-ko tarigen, lane ge•brigipa rama sorokrangko tarigen aro New Shillong songjinmaona re•gipa rama lane ge•gnioniko lane ge•briona taridapna on•gimin ong•achim.
Una agreba, Prime Minister, Upper Shillong-o rikgigimin Farmers-cum-Training Centre-ko nokdonggae on•angaha.
Ia tom•anio Prime Minister aganprakengon, Viksit Rajya-oniko Viksit Bharat-ko manienganiara, Viksit Northeast-na salgro salaram jolni manderangni gisik on•aniko mesoka inenba parakataha. Ua Nari Shakti-na chakpaaniko on•enganinaba manderangko mitelpilskaaniko dakangaha.
Indake, Salgro salaram-ni namroro silroroanina uni niksamsoenggipa ‘Ashtalakshmi’-ni bidingo janapataiengon, salgro salaram a•dok namen tourism-na, badingchiwale cha•na namgipa aro South aro jatni dakbewalrang Southeast Asia baksa nangrimgipa a•dokrang ong•a inenba Prime Minister aganaha.
Una agreba, Mission Palm Oil, ian salgro salaram jolo kejul aro narikel baganko gee game cha•enggiparangni man•gniko bariatna inenba to tariani karkanakoba Prime Minister oprake on•angan baksa gee game cha•enggipa manderangko mitelpilskaaniko dakangaha.
Unbaksana, batanggimin 209 bilsio, Sela Tunnel aro Doni Polo Airport-na pangchakani ro•ongko PM songe on•angahachim, aro da•alo, a•songni manderangni namgnina kam ka•e dakchake on•anggiparangkoba ua mitelpilskaaniko dakangaha.
Indake, sorkarini gita me•chikrangko gamchate ra•e kamko ka•engon, salgro salaram jolo janggi tangenggipa me•chikrangni janggi tanganiko altubatatna gita, International Women’s Day-ko maniani salo, Gas cylinder-ni damko gong 100 ni gita komiata ineba PM janapataha.
Unbaksana, ua Arunachal Pradesh-ni Skotong Minister-ni dol gimikon a•doko songdong a•chaenggipa manderangna, nokantionan chi pipe-ko sokatna man•ahaninaba nama skaniko on•atan baksa, a•dokni silroro namroroatanina kam ka•anio skanggipa gadango ong•enganinaba, an•tangni kusi ong•aniko parakataha.
Indake, PM-JANMAN scheme-ni ning•o Manipur a•doko, Aganwadi Centre-na pangchakaniko PM songe on•angaha.
Indake, Power sector-ko niatgenchimode, Arunachal Pradesh-o Dibang Multipurpose Hydropower Project aro Tripura-o Solar Power Project-ko a•bachengatengaha inenba PM janapatan baksa, Dibang Dam-an Salgro salaram jolo chu•batsranggipa dam ong•gen inenba parakataha.
India-o songdongenggipa manderang pilakan uni nokdangni mande gita ong•a ine PM aganan baksa, songdong a•chaengipa sakantinan, pucca nok, indin nangnikaniko on•a, rongtalgipa ringani chi, bijoli, paikana, gas connection, indin sanna bannaniko on•a aro internet connection-ko on•a ku•rachakangaha.
Na·simang iakoba poraie nina man·gen: Me·chikrangna minge tangka chamsoaoni 18%ko an·seng-baljokanina jakkalgen: Ampareen
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
