Shillong, Aug 19: Meghalaya Legislative Assembly-ni Autumn Session-ko September 10 tarikoni a•bachenggen ine Bristibar salo Meghalaya Assembly-ni Speaker Metbah Lyngdoh parakataha.
Autumn Session-ko ong•atani bidingo chanchirimna gita Bristibar salo Business Advisory Committee-ni tom•aniko ong•atangaha aro ia tom•anio a•dokni Deputy Chief Minister Prestone Tynsong, Opposition dolni dilgipa Dr Mukul Sangma, MLA Ampareen Lyngdoh, MLA Balajied Synrem aro dingtang dingtang official-rangba dongpae bak ra•angaha.
Assembly Speaker-ni u•iatani gitade, ia tom•anio Business Advisory Committee chanchirimangenba, Autumn Session-ko re•baenggipa September 17 tarikona ong•atna tik ka•angaha.
Autumn Session-ni salgittamko government business-na aro salgittamko private business-na jakkalanggen ineba Lyngdoh parakataha.
Meghalaya Legislative Assembly-ni Commissioner & Secretary Dr Andrew Simons-ni tarie on•gipa calendar-ni gitade, September-ni 10 tariko ia Autumn Session-ko a•bachengatani salo, Business Advisory Committee-ni Report-ko Assembly-ni Speaker parakatgen.
