Shillong, March 19: Re•anggipa March 5 tarikoni a•bachenggipa Meghalaya Legislative Assembly-ni Budget Session-ko da•al Sukrobar attamchibara matchotataha aro ia sal 15-na ong•atanggipa Budget Session-o dingtang dingtang kamrangni bidingo chanchirimanirangko aro jera ra•grikanirangko nikangna gita man•aha.
Ia budget session-ko Meghalaya a•dokni Governor Satya Pal Malik-ni aganprakanichi a•bachengataha, jeon ua a•doko namroro silroroaniko ra•bana gita sorkarini kamrangni gimin aganangaha.
Governor-ni aganprakangani ja•man, uni watchanggalgipa dingtang dingtang nangchongmotgipa kamrangni bidingo opposition dolni membor-rang sorkariko sing•doskaaha aro opposition membor-rangni sing•doe jera ra•grikanggipa mongsonggipa kamrangara, Meghalaya Energy Corporation Limited (MeECL)-o tangka paisani gita neng•nikani, Meghalaya aro Assam a•dokni sima arirango meligrikgijani, petrol aro diesel-rangni dam tang•doani, contract-na skienggiparangni neng•nikani, GHADC-o kam ka•giparang aro skigiparangni dormaharangko on•na man•gijani, dingtang dingtang dolrangni dabienggipa Inner Line Permit (ILP), gital Education Policy aro uandakgipa kamrangan ong•aha.
Sal 15-na Budget Session-ko ong•atanio a•dokni Chief Minister Conrad K Sangma-ba dingtang dingtang sing•anirangna aganchakanirangko aro talatanirangko on•angaha aro uarangoni mongsonggiparanga a•doko niam retirangko rakkiani, MeECL-o tangka paisani gita man•enggipa neng•nikani, GHADC aro SSA skigiparangna dormaharangko on•na man•gijani aro uandakgipa gipin kamrangan ong•achim.
2021-2022 bilsina Meghalaya sorkarini tarigipa budget ba tangka chamanikoba a•dokni Chief Minister, ia budget session-o jinmana parakataha.
