Shillong, June 21: A·gilsakni gipin biaprango gitan chang 7-gipa International Yoga Day-ko Meghalaya a·dokni dingtang dingtang biaprangoba maniangaha.
2014 bilsio India a·songni Prime Minister Narendra Modi, United Nations-ni general assembly-o aganprakengmiting somoio, Yoga Day-ko manina gita proposal-ko on·chengahachim aro uandaken da·o bilsiantian mandeni gisik aro be·en bimangna an·seng baljokaniko on·na miksonganio ia International Yoga Day-ko a·gilsak gimikon June jani 21 tariko manirongengahachim.
Ia salko maniani bak gita dingtangmancha Shillong songjinmani North East Institute of Ayurveda & Homoeopathy (NEIAH)-oba program-ko ong·atangaha aro ia program-ko ong·atanio institute-o poraienggipa chatro chatrirang aro kam ka·enggiparangba bakko ra·angtokaha.
Ia program-ko ong·atanio NEIAH-ni Director, Professor (Dr) Pardip Kumar Goswami, jinmana aganprakengon, ia salni namgipa skaniko on·angenba, da·o gita COVID-19 giproroengmiting somoio yoga-ko ranta ka·jringanichi gisikni gita tom·tomaniko aro an·seng baljokaniko man·gen ine program-o bak ra·gipa sakantikon yoga kal·jringchina didiangaha.
Apsan daken ia chang 7-gipa International Yoga Day-ko Shillong songjinmani 101 Area-oba maniangaha aro ia program-ko ong·atanio Army sipairang aro uamangni nokdangrangba bakko ra·angtokaha.
Indake ong·engon, ia chang 7-gipa International Yoga Day-ko Tura-o donggipa dingtang dingtang BSF dolrangba maniangaha aro ia salko maniani bak gita dingtangmancha COVID-19-na dongimin niamrango pangchake yoga-rangko dake mesokangaha.
Ia salko manianio Tura BSF SHQ-ni DIG Soorya Kant Sharma-ba dongpae bakko ra·angengon, da·o gita sabisirangni giproroengmiting somoirango noktangtangon donge, an·tangtangko an·seng baljoke rakkina gita yoga-ko ranta ka·jringchina BSF sipairangko aro uamangni nokdangrangko didiangaha.
