Tura, August 2022: Turani SP Pa Vivekhananda Rathore-ni kobor-na ui·atani gita, adita sal somoirangna skang Tura jilla-o pilak be·en bitin, mesu samjak, bolam bite, chi·gipa cha·ani bosturangni damrang tang·dodataniara ramram manderangna jemangan hajira ka·e janggitangachim ba saa ding·aniko man·e neng·nikaniko man·engachim uamang damrangni baridatani a·sel sinjetani man·beenga ine nike a·selrangko am·sandirokna manderangko sruk wataha. Sandie man·ani gita Meghalaya Chamber of Commerce ine biming dongipa dol jekon Bernard Rimpu N Marak, Wilvar Dango Marak, Anish Sangma, Patcheng Sangma aro gipinrang, bading chiwale cha·giparangoniko bang·a tangkarangko gilachim aro No Object Certificate-ko ra·china draachim. Una agreba Bernard Rimpu N Marak District Council Member ong·e Trading License-ko on·a bang·a tangkarangko ra·achim. Bading chiwali cha·giparang uamangni bang·a koros-ko kolgapatnasa bostuni damrangko bariate palskana nangaha ine nikaha.
Meghalaya Chamber Of Commerce dolko niamo pangchake segataniko dakaha. Tura songjinmao niamni gita kamrangko a·bachengatani ja·mano Turani Sweets and Confectionaries dolba bang·a chi·gipa cha·ani bosturangni damko gitchamni damna adha komi palna namnike ra·chakaha ine ui·ataha.
Mikkangchi saoba indake daksruke tangka gilani, bostuni damrangko dakiani ba uandakgipa niamni a·palo kam ka·anirangko rim·a man·ode niamo pangchake jrima sastiko on·gen ineba Turani SP Pa Rathore kobor-na ui·atha.
