Shillong, Oct 28: AICC-ni ge·etaniko man·ani ja·man, Congress dolo primary member-rangko biming segataniko altubatatna gita Meghalaya Pradesh Congress chasongni kri digital-ni bilko jakkale kam ka·na re·chakataha. Ia kamna da·ororoni somoio jakkalenggipa technology-ni bilko uamang jakkalaha jean manderangna namen jakkaltogipa aro altuae ma·sie jakkalna man·aigipaba ong·a. A·songo vote pu·onna man·giparangko serike donna gita bilakgipa database-koba Congress dol donaha jechin membor ong·pagipa chong·motrangsan iako jakkalna gita man·aigen aro iako jakkalgiparangna digital-ni gita primary member identity card-rangkoba on·jole manderangna bimingtangko segatanio altugipa cholkoba on·jolaha.
Bristibar salo iako a·bachengate on·angao aganangengon, Congress dol pangnan chasongni kri manderangna jakkaltogipa aro an·chingni nanga kamrango altuae dakchakaniko on·gipa gital technology-rangko ra·bachengronggipa ong·aia ine parakatan baksa, ia niksamsoani aro bebera·e kam ka·anirangara Meghalaya Pradesh Congress party-ni ong·baani kam bewalon dongkamaha aro iakon a·songni Prime Minister gitcham Ma Indira Gandhi aro Information Technology (IT)ko a·songona re·bachenggipa Pa Rajiv Gandhi sagimaangni niksamsoa dongaoniko chasongrangna ja·rikrorobaaha ine Meghalaya Pradesh Congress Committee-ni President, Pa Vincent Pala parakatjolaha.
Uamangni niksamsoaniko ja·rike chinga da·alo namroro-silroroaniko ra·baani nambatgipa jakkale dolo primary member-rangko biming segataniko a·bachengatenga, aro ian Meghalaya a·doko songdongenggipa manderangni janggi tangani gadangrangko namdapatna gita chingni skanggipa ja·kuko de·chakatani ong·a aro sokbagni salrango chingni bil-sasonko jako ra·e kam ka·anio namroro-silroroaniko on·gnigiparangko on·tisa mesokani ong·enga. Ia technology-an buchuma-budepa aro chasong damberangni bimingrangko segatanio aro dolni membor ong·kamgipa ong·na dakchakanikoba on·gen, uni gimin dolni miksonge re·mikkanganio bak ong·pachina gita a·doko songdongenggipa gimikkon anga mol·mola aro hai an·ching mikkangchina nambate re·mikkangna ine MPCC-ni padot agandapataha.
Congress dol, uamang baksa membor ong·na bimingrangko segatani cholrangna Whatsapp-o chatbot-ko jakkalaha jeon manderang on·sogimin mobile nombor +91 90779 09175-ona ‘Hi’ ba ‘Hello’ mangmangkosan see watatna nangaia, jeni ja·man biming, Voter id number-ko am·aton bimingtangko segatenggiparang, voter id-ni noksako aro an·tangko jachipchange watdoatna nanggen. Iako dakna gita minitsaba nangja aro iako dakmanahaon, segatenggipa mandeni watdoatgipako chekani ja·man joljolan digital primary member identity card-ko Whatsapp gita watatgen
