Shillong, May 23: Shillongni Mawdiangdiango gital rikenggipa Meghalaya Legislative nokko a•dokni speaker Metbah Lyngdoh an•tangan niena sienga.”Maini a•selo ia nokni protchongara be•gruaha iako sandirokna nanggen, iani gimin knalo High powered Committeeo segate kam ka•anggnok” ine Lyngdoh aganaha. Ia protchongni be•gruaniara rikanio maiba gualani aro uko rikna tarisamsoanio maiba daksretanirang ong•ahakon ineba speaker aganaha. Iako rikenggipa companyni manderangkoba knal angni nieanio dongpachina u•iataha, aro iani gimin dingtangmancha jakgitelgipa sandirokaniko dakna nangchongmotgen” ineba speaker Lyngdoh aganaha.