Shillong, March 22: Butbar salo Assembly tom·anio, a·dokni rama-jal·angrang namrorojaengani gimin Umsning-ni Congress MLA Dr Celestine Lyngdoh, rama-jal·angrangan a·dokni namroro-silroroanio pangchakani ong·a ine aganani donggenchimoba, Meghalaya-ni rama-jal·angrang namtingjaen manderang bang·a neng·nikaniko chagrongskaenga ine janapangenba, a·dokni ramarango badita jrima gnang garirang re·na gita man·enga ine sorkario sing·doaniko dakangaha.
Iana aganchakaniko on·angengon, a·dokni dakchakgipa skotong minister Pa Prestone Tynsong, garirangni jrima gnang re·na man·ania, national highway-rangoni a·jani mongsongbatgipa ramarangona Indian Roads Congress (IRC)-ni dongimin niam gitan ong·aia, uan ton 12 oni ton 18-rangona ong·a ine talatan baksa, indiba bang·a changon trak garirang ton 35 oni 40-rangona kingkingba jrima gnang re·enga ineba Pa Tynsong aganchakangaha.
Unbaksana, a·dokni PWD ramarangni chatanikoba IRC-ni dongimin niamrang gitan ja·rike tariatenga ine u·iatanga baksana, ramarangko tarina skangba IRC, a·dok damantini gimin poraie nianiko dakatenga ineba dakchakgipa skotong minister, MLA-ni sing·doanina aganchakaniko on·angaha.
A·dokni ramarangko nirok-simsakani bidingo aganangskaengon, a·dokni chamenggipa ramani project-rangna mangba warranty-ko man·chapatna gita a·dok sorkari kamko ka·enga ine Pa Tynsong parakatenba, songadamo tarigipa Pradhan Mantri Gram Sevak Yojana (PMGSY)ni ramarangkoba IRC-ni Rural Roads Manual, 2002 (SP-20)-ni niamko ja·riken tariatenga ineba ua u·iataha.
Project-ko matchotani ja·man PMGSY ramarangko bilsi-bongana nirok-simsakna gita dongimin Annual maintenance contract (AMC)ni bidingo Pa Tynsong-ni aganangani gitade, RIDF XXVI-oni dipat chamgipa scheme-rang aro systematic maintenance programme (SMP)-ni ning·o chamgipa mitam scheme-rangnasan tarigimin ramarangko nirok-simsakna gita donsoaha.
Iakoba poraie nina man·gen: Bang·a skulrangan STEMS program-ni skul bus-rangko chalaina sikjaenga: CM
