Shillong, April 18: Election Department-ni gita Shillong aro Tura Parliamentary Seat damgninan, April 19 tariko ong•atna sienggipa Lok Sabha Election-o skanggipa changna pu•onaniko dakna gita sak 31,247 bimungrangko segattokaha ine parakataha.
Chu•gimik sak gittam me•a ba me•chik ine an•tangko changijagipa voter-rang, sagal nalsachini sak bonga voter-rang ong•a, indake ong•engon, sak 14,048 polling personnel-rangko dam 3,512 polling station-rangona watatman•aha.
Meghalaya a•dok gimiko sak 2,226,567 voter-rang gnang, uarangoni sak 1,400,411 voter-rang Shillong seat-ni aro sak 826,156 voter-rang Tura seat-ni ong•a ine Chief Electoral Officer BDR Tiwari, kobor ra•timgiparangna u•iataha.
Una agreba, Mobile Shadow Zone-ni ning•o dam 133 polling station-rang, kenchakani gnanggipa biaprangni ning•o 409 polling station-rang aro neng•nikanirangko man•enggipa biaprangni ning•o dam 29 polling station-rang ga•aka.
Uasan ong•aigija, Assam-ni sima ari-ko man•gipa dam 187 polling station-rang, Bangladesh sima ari-ko man•gipa dam 140 polling station-rang, sima arini gisepgriko donggipa dam 26 polling station-rang aro Assam-ko nappake re•na nanggipa dam 128 polling station-rangba donga ine Tiwari agandapangkuaha.
Indake ong•engon, battangimin 2019 election-o pu•ongiparangna bate ia changni election-o sak 315,195-rangchi baridapaha. Jeon sak 11,720 voter-rang be•enni gita nengnikaniko man•giparang aro bilsi 85 ba una batgiparang sak 10,185 voter-rang ong•a.
Model Code of Conduct-ko a•bachengataoni, mingbri FIR-rangko segataha aro chu•gimik tangka gong 10.43 crore-rangko rim•aha ine Tiwari janapataha.
Je manderangan, Electoral roll-rango bimung dongeba Elector’s Photo Identity Card (EPIC) -rang dongjachim, uandakgipa manderang gipin ID card-rang jekai Aadhar Card, MGNREGA job card, Passbook, Smart card, Driving licence, PAN card, NPR-ni ningo RGI-ni on•gipa Smart card, Indian Passport, Photo donggipa Pension lekka, Sevice Identity Card aro MP ba MLA ba MDC-rangni on•gipa Official ID card-rang aro be•enni gita nengnikani donggipa manderangna dingtang mancha tarigipa card ba Unique Disability ID (UIDID) card-rangchiba pu•ona gita man•gen.
Na·simang ia video-koba nina man·gen:
Na·simang iakoba poraina man·gen: Meghalaya Human Rights, kamgimin manggisirangni report-ko bi•ata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
