Shillong, Sept 30: Meghalaya a•doko skanggipa changna Tribal me•chikrangoni Rebecca Suchiang, Chief Secretary-ni kamko jako ra•aha aro PP Trivedi-ni ja•man uan me•chikrangoni gnigipa Chief Secretary-ba ong•aha. PP Trivedi, 1980 bilsirango Meghalaya a•dokni Chief Secretary ong•e kamko ka•ahachim.
Meghalaya a•dokni Chief Secretary MS Rao, September 30 tariko kamtangoni neng•takangaha aro uandaken uni biapo Rebecca Suchiang, Chief Secretary-ni kamko jako ra•rikskaaha.
Chief Secretary-ni kamko jako ra•ani ja•man kobor ra•timgiparang baksa agangrikengon, Khasi-Jaintiarangoni skanggipa me•chik Chief Secretary ong•na man•ahani gimin kusi ong•a ine parakangaha.
Mikkangchi kamtangko ka•anio ua dingtang dingtang ra•bianirango chagrongna nanggenchimoba unbaksa apsan kam ka•rimgipa officer-rangni dakchakanichi aro bakrimaniko on•anichi ua kamtangko chu•sokatna man•gen ineba Suchiang, an•tangni ka•dongchakenganiko parakataha.
Chief Secretary-ni kamko ka•anio uni mongsonggipa daitoara mai ong•gen ine sing•on, uni dakna nanggni kamrangde bang•a indiba a•doko lekka porani gadang tang•onengani gimin ua a•doko lekka porako tang•doatna gisik on•bate kam ka•gen ine gital Chief Secretary parakataha.
MeECL-ni kamrango dingtanganiko ra•bana gita ua jotton ka•gen ineba Chief Secretary aganaha. A•dokni gital Chief Secretary Rebecca Suchiang, MeECL-niba Chairman aro Managing Director ong•achim ine nikna man•a.
Indake ong•engon, a•doko an•seng baljokani kamrangko nambatatna aro Assam-Meghalaya a•dokni simarango meligrikgijanirangko namatna gita ua an•tangni man•a dipet kamko ka•gen ineba gital Chief Secretary parakataha.
