Tura, April 2: A·gilsakni gipin biaprango gitan Meghalaya a·dokoba Jisu Kristoni chisolo sianiko gisik ra·na gita ‘Good Friday’ ba Rongtalgipa Sukrobar salko maniangaha.

Ia salo Kristian bebera·giparang, giljarangona re·ange Isolko olakkiangan baksana an·tangtangni paprangko ku·rachake an·tangtangko gital dake Isolna on·kangtaiangtokaha.

Ia Good Friday ba Rongtalgipa Sukrobar salara Jisu Kristoko chisolo datkape so·otaniko aro uni papirangna sichakaniko gisik ra·e manirongenggipa sal ong·a aro sastrooba Jisu Kristoko Judas Iscariot-ni pale cha·anichi maikai Roman sipairang rim·na man·ahachim aro uko maikai chisoltangko chilate Skobikrok a·briona rim·angani ja·man chisolo datkape so·otahachim, talate seanirangko nikna man·a.

Ia Good Friday ba Rongtalgipa Sukrobar salko maniani bidingo Shillong-o donggipa Cathedral Mondolini Reverend Father Pascal Lyngdoh, kobor ra·timgiparangna talataniko on·angengon, ia sal gitao Jisu Kristoko chisolo datkape so·otaha indiba ua gittamgipa salo chakatpilaha ine parakataha.

“A·gilsakni paprangna Jisu saknaanirangko chakna nangaha aro uni saknae sianichi mande paponi jokatako man·skaaha. Ia salo manderang tom·tomaniko bi·na giljaona re·batokaha,” ine Fr Lyngdoh aganaha.

Good Friday-ni namgipa skaniko a·dokni manderangna on·angengon, Jisu Kristoan tom·tomani aro ka·saani bidingo a·gilsakna skiprakangaha aro ua darang toromkoba mikkang niteani gri mandena namgipa dakmesokani ong·aha ine Father Lyngdoh aganaha.

“Ia salo anga tom·tomanina, katchaanina aro ka·sagrikanina bi·na ska aro an·ching pilakan neng·nikanirang donggenchimoba Jisu Kristoo bebera·giparang ong·na. Tom·tomani aro mandeskana ka·saanio torom ge·antian dakchakaniko on·na nanga,” ineba Fr Lyngdoh aganaha.

Ia bilsioba sajinmarang dongkuengani gimin Good Friday manianio pilak mondolirangan sorkarini dongimin niamrangko ja·rikesa jinma olakkianirangko aro bi·rimanirangko ong·atangaha.