Gujarat, Sept 19 : Vadodara-o donggipa junior under 19 boys state camp-o a·dokni kriket kal·gipa dolna ranta ka·ani cholko on·na gita Baroda (Vadodara) Cricket Association-ni u·irikanio Meghalaya Cricket Association, Vadodara Cricket Academy baksa bakrimangaha.Meghalaya Cricket Association-ni dakchakgipa padot Dipul Ryntathiang-ni re·chapanganio, association-ni jakrikra Gideon Kharkongor, Meghalaya-o aro a·jao kriket kal·aniko mikkangchi tang·doatna miksonge dingtang dingtang cholrangni gimin gipin officialrangni dongpaanio BCA-ni CEO Shishir Hattangadi aro VCA-ni Director Harendra Patel-maangko gronge agangrikangaha.Meghalaya-ni biap aro climate-ni obostarangni a·sel a·doko kriket kal·anirang nama gadango ong·na gita man·jaenga maina kal·giparang bilsio jagittamrangni gitasan kriket kal·na somoiko man·aienga uni gimin wachini somoio mikkarangchi neng·nikatani grigipa biaprangko aro a·songo nambatsranggipa kriket kal·ani nama cholrang gnanggipako sandina gita nangaha ine Kharkongor parakataha. A·songo kriket kal·chakna nambatgipa biap Vadodara-o nama cholrang jekai kal·chakram biap, gym, auchakgipa biap ba ugitarangko Meghalaya a·dokna on·nan baksa dingtang dingtang academy team-rang baksaba kal·na cholrangko on·enga ineba u·iatkuaha.

September 20 tariko a·bachengenggipa BCCI tournament-ko Ranchi-o ong·atna skangan a·dokoni kriket kal·gipa gimik dolkon a·songni dingtang dingtang biaprango donggipa state camp-rangchina watatenga ine janapatan baksa, da·o a·dokoni me·chik bilsi 19-ni ning·ogiparangko Bengaluru-ni Just Cricket Academy-o donenga, ja·delgimin me·chikrangko Cricket School Bengaluru-chi watatgen, indake me·asa bilsi 25-ni ning·ogiparangko VCA Vizaq-o donenga aro ja·delgimin me·asarangko Pondicherry-o donskaenga ineba Kharkongor aganangaha.