Shillong, Sept 16: Meghalaya Regulation Gaming Act and Rules, 2021-ko ra·galna ba bon·atna man·jawa maina, joarangko kal·e a·joltangni manderangni namgijaona sokanggniko ia niamchin champengna gita man·a ine a·dokni skotong minister Pa Conrad K Sangma, Sukrobar salo aganangaha.
“Ia gaming acts ba niamrang, joltangni manderangko kal·na champengani ong·a, uni gimin ia niamko ra·galahaode, an·chingoni chasong damberang kal·na gita man·aignok, uamangko champengna niam dongjawajok,” ine Pa Sangma u·iataha.
Ia kattarangko Pa Sangma, da·o ong·enggipa assembly tom·bimonganio Meghalaya Regulation Gaming Act and Rules, 2021-ko bon·atchina gita zero hour-o Nongkrem legislator Lambor Malngiang-ni dabianina aganchakangaha.
Royalty-oniko man·enggipa kajinarang gong kror 600 oni kror 100 mangmangkosan a·dok man·aiaha ine janapatengon, gaming zone (joa kal·aniko) a·dok sorkarini ra·bana miksonganian a·dokna kajinarangko ong·katatna gitasa ong·a ine Pa Sangma parakataha.
“Ia kamo chinga chu·gimikkon pilakna namgniko nigrike dakna nangnikenga aro gong kror 500-600 kror -rangona kajinako ong·katata baksa a·joltangni manderangni kal·anikoba champengna nangnikenga. Uni gimin, a·dokni manderangni chel·ao chong·motan, sima jolosa ia gaming zone-ko chalaina gita chanchiaha aro ia miksonganiosa pilak kamrangkoba ka·chakataha,” ine skotong minister aganangkuaha.
Uni u·iatani gita, casino-rangko challaina ia bilsi January jao sak 8 manderang license-na dorkastorangko on·aha jeoni sak 3-na mija March jao jadokna choligipa provisional license-rangko on·ahachim, indiba ia mamlao mija May jao dingtang dingtang giljani dilgiparang suk ong·nikjae uko grongaha. “Unomiting, anga giljani dilgiparangna, casino ba joa kal·aniko Shillong-onade ra·bana miksongja indiba Guwahati sambaonasa ine talataniko on·angaha”.
Iako namnikgijagiparang bang·ani gimin uana pilak kam ka·anirangko dontongataha ine janapatenba, sakbonga manderangni dorkastorangko dontongataha aro provisional license-rangko darangnaba on·a dongjaha ine Pa Sangma taldapataha.
“Manderangni namnikgijani kosako draede chinga a·dokona joa kal·aniko ra·bajawa ine giljani dilgiparangna aganataha aro apsan kattakon NGO-rangko grongani somoioba anga batanggimin May jaoni da·alona ia mamlao maming ja·kuko de·dapata donggijanikon aganataha ine skotong minister talataha.
“A·dokni manderangna namgniko ra·banasa chinga dangdike on·enga aro manderangni ku·rangrangko knachakna sorkarini daito ong·a ine aganatan baksa, da·o ra·baenggipa CrPC aro CPC-ni mamlakoba a·dokni ge·gittam autonomous district council (ADC)rango drae ra·gatna miksongani dongja ineba Pa Sangma toe agandapataha.
“Anga ka·donga iani bidingo dingtangmancha gisik on·giparang baksa agan-golpogrikachi aro apsan kam ka·anichi a·dokna namgni ong·gipa chol-ramako am·na man·gen maina, bil-sasono donge dakgrikaniko anga pangnaba bebera·ja indiba dolgnina namgniko ra·banasa an·ching cholko sandina nanga,” ine skotong minister agandapataha.
