Shillong, Oct 29: Ru⋅uta somoirangoni Harijan Colony bidingo jing⋅jenganirang ong⋅engon, Dakchakgipa Skotong Minister Pa Prestone Tynsong an⋅tangan High Level Committee-ni Chairman ong⋅e, ia jingjenge dongenganiko matchotatsrangna Meghalaya sorkari kam ka⋅aha ine ui⋅ataha.

Mylliem-ni Syiem-na kajina gamna nanggipa tangka gong kror 2-ko matchotaha aro ia a⋅ani kosako dakna nanggni kamrangko salsa salgnini gisepon ka⋅chakatatgnok ine kobor ra⋅timgiparangna ui⋅ataha. Ia a⋅selko ra⋅e kajia golmalrang ong⋅ani dongjawama aro sorkari ua jolrango maiko dakna miksongenga ine sing⋅on, niamo dongimin gita kam ka⋅enga aro maming neng⋅nikaniko ra⋅bajawa.

Nanga ong⋅ode a⋅paloni je dolrangba ba NGO-rangba uamangni chanchiako on⋅a man⋅gen. Ua jolko nitodapatani giminde gisiko bimang daksoaha indiba songdongenggiparangko gipin biapona jitatani giminde niamo pangchake kam ka⋅anggen inesan aganchakaha.