Tura, July 27: Meghalaya a•dokni All Deficit-Pattern Schools’ Teachers’ Associationi tom•aniko july janu 26 tariko Shillongni Garo Union secondary school noko ong•atangaha.
Meghalaya a•doko dam 13 mangmang deficit pattern skul gnang uarangoni skul dambride UP aro dam skude secondary skulrang ong•a. Ia deficit pattern ingipa skulara gipin deficit skulrang gita ong•ja. Uamang Basic scale aro DA kosan man•paenga. Chu•gimikgipa deficit skulrangde sorkari skulrang gitan pilak allowancerangko man•enga indiba deficit pattern rang, medical allowance, hill allowance house rent indakgiparangko man•pajaenga. Ia neng•nikanirangni bidingo chanchigrikna uamang mongolbal salo tom•e chanchigrikangaha. “1993 bilsionin chingni nangnikanirangko sorkari baksa agangrikbaenga indioba sorkari chingko nichanggalenga, Deficit-pattern skulo sak 127san kam ka•giparang gnang uko mangmangba sorkari mamingkoba dakkuja. Skuloni retire ong•ahaoba maming man•pilskaanirang jekai, gratitude, pension aro ugita gipin man•anirang dongpaja” ine Associationi padot Shri Lindias D Sangma aganaha.
Ia pilak neng•nikani aro dabianirangko uamang skotong minister, education minister, dakchakgipa skotong minister aro Director of school education and literacy naba chittiko on•aha.
Skigiparang a•songko jatko namatna kam ka•giparang ine sorkari u•ibebeode chingni dabianirangko chu•sokatpachina, mikkang nitegija kam ka•pachina ine uamangni mol•molatgipa chittio parakataha
