Shillong, March 12: India a⋅songni jakgitelani bilsi 75 gapna sienganiko nisengsoengani bak gita sal bongana photo mesokaniko ‘Azadi ka Amrut Mahotsav’ ine katta bichong done ong⋅atani salko Meghalayani Governor Pa Satya Pal Malik, DDK Shillong-ni Director Pa Hynniewta-ni dongpaanio do⋅ga oprake on⋅aha.
Ia programko Indiani sorkarini, Ministry of Information and Broadcasting-ni ning⋅o Regional Outreach Bureau Shillongni gita ong⋅ataha. Ia photo mesokanian a⋅songni Prime Minister Pa Narendra Modi-ni a⋅songni manderangko jakgitelanina an⋅tangtangni janggiko on⋅chakgipa matgrikrangko gisik ra⋅atna aro iachin a⋅songko chel⋅chakna miksongani baksa nangrimani gnang.
Dandi March-ni tiktak salo aro Azadi Ka Amrut Mahot-ko oprakanio Pa Modi Sabarmati Ashram-oni nisanko badalataha. Iako oprakatani somoio jakgitelanina dakgrikdilgipa matgrikrang jedake Mahatma Gandhi, Vallabhai Patel aro Netaji Subash Chandra Bose-ni noksarangko salsuaatan baksa uamangni a⋅songni manderangna nisamsoani bidingo aganprakjolaha.
Maniani salo Meghalaya a⋅dokni Governor Pa Satya Pal Malik dingtang dingtang susaanio chegiparangna boksiskoba on⋅angjolaha
Ia apsan salo India a⋅songni jagitel ong⋅ani bilsi 75 gapaniko gisik ra⋅na gita East Garo Hills ni Chisobibra-o March jani 12 tariko East Garo Hills ni Deputy Commissioner Pa Swapnil Tembe, Additional Deputy Commissioner Pa Alosioush Ch. Marak, EAC tra Yokosima W. Momin aro gipin a⋅gipi manderangni dongpaanio oprake on⋅angaha. Ia manianio Azadi Ka Amrut Mahotsav ine kata bichongko don⋅e East Garo Hills ni jakgitelanina dakrikgipa matgrik Pa Togan Nengminja ko mandera⋅aniko dakangaha.
An⋅ching da⋅o jakgitele janggi tanggenchimoba, dingtang dingtang neng•nikani jedake, kangal cha•ani siani, sabisirang-oni jokna mankujaenga aro Pa Togan Nengminza-chi de⋅mesaataniko man⋅a nang⋅a ine Pa Swapnil Tembe aganangaha.
