Noida, Nov 19: A·songo niksenggipa aro mingsing minggamgipa University rangoni ge·sa Sharda University, jean Uttar Pradeshni Noidao donga Meghalaya a·dokni Skotong Minister Pa. Conrad K. Sangmako maan ra·e una ‘Honoris Causa’ upadiko mijalo University ni bri gipa Convocationo Vice-Chancellor Dr. Sibaram Khara ni jakchi ma·mongni Education Minister Dr. Ramesh Pokhriyal Nishank ni bak ra·paanio on·angaha.
Tom·anio, Skotong Minister, “chadamberangko ra·dona aro uamangna namgniko dakna sakanti bidako skie on·enggiparang aro dilgiparangan daitoko ra·na nanggen, uamangko nol·e namgipa ramao re·ate a·songko mikkangchina daariatbo” ine aganaha.
Je dakode daitoko ra·gipa chatro chatrirang aro a·song chigana simsakgipa manderang ong·gen una miksonganiosa chadamberangko tarina aro dal·atna nanga. Universityo uarangko dakengani gimin anga de·mitela ineba aganaha.
Upadi on·gipa Certificate-ko ra·chakanio Pa. Sangma a·songko Sharda Universityan namgipa aro nitogipa bimangona ra·bagen ine aganaha. Angni miksongani ba nishan de a·dokni sakanti chadambekon namgniko dakna changgipaona re·dilani ong·a; mande jelaianiode maming namnian dongja indiba change sapaniosa. Nang·ni nambatako na·a nang·ni songsal na, jat na, a·dokna, a·songna aro an·chingni donchakenggipa a·gilsakna on·bo ineba aganaha. Universityo poraienggipa rangni porikka rango name dakahanichi poraichakramna namgipa bimingko ra·bahani giminba ua de·mitelangaha.
Re·baenga sal somoirango University nambata gadangona tang·dororoange poraienggiparangnaba nambata cholrangko aro janggi tangani bewalrangko on·anggen uni gimin sakanti poraienggipaan kakket aro bebeo poraie nishan tangtangona soke chu·sokgipa ong·na jotton ka·bo ine didie bang·a chu·sokanirangkon chadamberangna on·enganina Universitykoba mitelaha.
A·songni poraichakram rangni tang·dororoenganiara Ma·mong Sorkarini Ministry of Education-ni ding·chike kam rangko ka·aniosa bite nangenga ineba aganaha.
Meghalaya a·dok sakanti chadambekon watchanggija maiobade changgipa sapgipa ong·atna raken ja·kurangko ga·e kam ka·enga aro skie on·ani a·bao sakantikon man·gope indakgipani a·bao a·songo skanggipa biapko man·na miksonganiba donga, uamangni changa sapanirangko jakkale cholrangko ra·china Sorkarini skaniba ong·a ine ma·mongni Education Minister Dr. Pokhriyal na Pa. Sangma aganaha.
Dr. Pokhriyal an·tangba Sharda University oniko Honorary Degree-ko man·gipa ong·e aganpanegon, namjabegipa sabisini somoio maidake neng·nikanirangko ra·bie uarangko cholrangona ra·baskana man·ahachim aro poraienggipa chadamberang indakmiting somoirangoba maidake a·songna on·gilahachim uarangko aganskaaha.
Universityo dam 56 a·songrangoni sak 2000 chadamberang poraienga, ian namen rasong chabeani ong·a. Sharda University India a·songosan ong·aigija gipin a·songrangonaba skiani a·bako giproroatenga ian kusini katta ong·a ineba aganaha.
Universityni Chancellor P.K.Gupta degree ko man·na mangmang poraiaigija gisiko nange aro skanirang baksa poraiosa nambata maina unosa an·tangni poraianiko gamchatnikbata ine aganaha. Sharda University man·a dipet dingtang dingtang Scholarship rangko on·e me·chikrangna bida ko on·na jotton ka·a ineba aganaha.
Convocation ong·anio sak 3593 undergraduate rangna aro sak 1203 post graduate rangna ma·mongni Minister Degree rangko on·angaha.
