Shillong, Feb 26: Assam a·doko chu na kajina ra·ani Value Added Tax (VAT) ko tang·onatan ja·mano Meghalaya a·doko sinjetanirangko man·skaanio Sorkari dingtang dingtang chu rangna 40 percent VAT kajina ra·engaoniko 37.5 percent-ona tang·onatskaaha.

Meghalaya ni sima ari kachape dongenggipa Assam a·doko chu na kajina ra·anirangko Sorkari komiatan ja·mano Meghalayaonaba komiataniko nangnikanirang sokbaahanio pangchake chu na VAT kajina ko bang·gija tang·onataha ine Dakchakgipa Skotong Minister Pa. Prestone Tynsong aganaha.

Meghalaya aro Assam ni gisepo chu ni damrang Gong. 10 oni Gong. 30 na bate dingtanggrikani gimin palananganirang komigen ine nikenba Meghalayaoba komiatna draatako man·aha. Bading chiwalani a·bao a·dok damgnini gisepo susaanirang dongani gimin kajinako komiatna man·gen ine nikenba chu ni VAT kajina ko 37.5 percent ona ra·onataha ineba Pa. Tynsong janapaha.