Shillong, June 7: Meghalaya sorkarini Meghalaya Entreprise Architecture (MeghEA) project-na mingnamgipa World Summit on the Information Society (WSIS)-ni award-ko man•ahani gimin Mongolbar salo, Meghalaya a•dokni Chief Minister Conrad K Sangma, an•tangni mittelpilaniko parakataha.
Iani bidingo kobor ra•timgipa manderang baksa agangrikengon, ia susaanio gimik dam 90 a•songrangoni dol 300-na baten ming 10-oni ming 12 gadangrango susaaha aro ia susaanio Meghalaya a•dok, gipin dal•dalgipa a•songrangkon chee ia award ba upattiko man•aha ine Chief Minister parakataha.
India a•song gimiko Meghalaya a•dokmangmangsan ia award-ko chegipa ong•aha aro ian Meghalaya a•dokna, Meghalaya sorkarina aro a•dokni Planning department-nasan ong•aigija a•song gimiknan mikkim rasongko ra•baani ong•aha ineba ua aganaha.
Ia Meghalaya Entreprise Architecture (MeghEA) Project-ara, Meghalaya sorkarini ning•o donggipa Planning Department-ni jako ra•e ka•enggipa project ong•a aro ia project-ni ning•o Government to Citizen or Business services, Government to Employee services aro Government to Government service-rangko man•chape dingtang dingtang bakrang dongachim.
Ia project-chi a•dok sorkari, technology-ko jakkale lekkani kamrangko komiatna man•engaha ineba Chief Minister parakataha.
