Tura, Nov 25: Chang 3-gipa Me•gong Festival ong•na siengon, Garo Hills-ni manderang changsatai gualna man•gijagipa namen mingsinggipa git ring•giparangna, tobegipa cha•a ringanirangna aro dingtang dingtang an•saoatani program-rangna kusi ong•bee nichaksoenga.

Ia bilsini Me•gong Festival-ko re•anggipa bilsio ong•atgipa apsan biap, chong•motan West Garo Hills-ni Jengjal, Baljek Airport-o November jani 29 aro 30 tariko ong•atanggen.

Pulni bimungchi minggipa ia Me•gong Festival-ara, Garo Hills-ni ma•eke dingtanggipa aro ning•tubegipa dakbewal rikbewalrangko gisik ra•e maniani ong•a.

2024 bilsini Me•gong Festival, ong•rongbewalna bate dal•batgipa ong•na sienga maina iano a•song gipinnisan ong•aigija a•songtango namen niksenggipa band-rangkoba ia festival-ona rimbaenga. Namen mingsingako man•giparangoni re•baenggipa band-rangara ian Swedish rock band Europe baksana rock icon-rang jekai Creed, fusion ba pop band Euphoria aro jawilwat-o kam ka•gipa aro DJ-producer Udita Goswami ma•ang ong•a. Iana agreba, jolo namen mingsingbegipa git ring•rakgipa dolrang jekai Da Suraka, Haystack Ladies, ma•gitcham pagitchamrangni gitrang baksa chasong gitalni gitrangko brine ring•gipa dol Summersalt aro gipinrang ia salgnini gisepo dingtang dingtang gitrangko ring•e manderangko an•saoatanggen.

Garo Hills-o git ring•na namnikgiparangko ra•doani aro uamangko teng•suangna chol on•ani bak gita, Me•gong Festival-o Meghalaya Grassroots Music Project (MGMP)-ni gita git ring•anirangkona mesokanggen.

Gitrangko ring•ana agreba, ia festival-o Garo Village ba a•chikrangni songdongram biaprangko mesokan baksana Chu bitchi song•susaani, jatni kal•susaani aro a•song gipinoni re•bagiparangna Maharaja tent ba tambu pinnanirangba iano donggen.

Festival-ni ticket-rangko kra•a dam chong•motan tangka gong 299-na pale, ia festival-o dingtang dingtang cha•ani ringanirang baksana jaktangchi sol•a repani aro an•saoatgipa kal•anirang jekai hot air balloon-o gadoanirang aro dingtang dingtang kal•anirangko kal•na man•a gita cholrangko iano on•anggen.

Uasan ong•aigija, ia festival-o chatro chatrirangna dingtangmancha napna gita uamangni ID-chi ticket kingprakko tangka gong 150-na brena gita man•gen. Tura, Williamnagar, Resubelpara aro Baghmara-o da•o ia ticket-rangko man•engaha.

Shillong, Meghalaya a•dok gimikni aro gipin biaponi re•baenggiparang, traffic jam ba gari jachange dongani bidingo aro biapko sandiani bidingo jajrengna nangjana gita, Me•gong Festival-ko ong•atgipa dolrang name chanchibewalaniko dake ong•atenggipa biapo camping site-rangko tarie on•angaha.

Ia festival-ko name ong•atna man•a gita, gari donani aro napna tarianiko name chanchisamsoe tariaha. Airport napchenggipaoni, General Admission (GA) aro Super Fan ticket ra•giparangna altuae aro naljoke ong•atenggipa biapona donsogimin chinrangko nie napangna gita man•gen.

Festival-ona jemangan gario re•baengachim, mongsongbate GA aro Super Fan ticket ra•giparangna dingtangmancha ong•atenggipa biap sambao gari donna man•a gita aro gari jachange donganiko komiatna gita runway-on gari donna gita biaprangko tarimanaha.

Indake ong•engon, Platinum ticket ra•giparang aro VVIP pass donggiparangna dingtangmancha napani ramarangko tarimanaha, jedakode uamang nengrae ong•atenggipa biapona napbana gita man•gen.

Re•anggipa bilsio, Me•gong festival-ona mingsinggipa band-rang ba git ring•giparang jekai Vengaboys, When Chai Met Toast, Armaan Malik aro Parikrama-rangko rimbaanichi bang•a manderangko salbana dakchakaha.

Na·simang ia video-koba nina man·gen: 

Na·simang iakoba poraina man·gen: NEHU-ona VC S. Shukla-ni re•bapilaniko NEHUSU, KSU-NEHU aro NEHUTA jegalsoa

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub