Tura, July 2: Sukrobar salo Meghalaya a•dokni Chief Minister Conrad K Sangma, North Garo Hills a•jani Mendipathar-o game ge•e cha•gipa dolrang baksa agangrikangaha.
Ia tom•anio Chief Minister baksana, a•dok sorkarini Chief Whip Marcuise Marak aro Kharkutta-ni MLA Ruper Momin-ba dongpae bak ra•angaha.
Ia tom•anio a•dokni Chief Minister jinmana aganprakangengon, gama ge•ani aro uandakgipa kamrangko tang•doatna gita sorkarini jako ra•e ka•enggipa kamrangni gimin talate on•angaha.
Ia jolrango game ge•e man•gipa ma•manti ong•telaigipa bosturangko tang•doatna gita sorkari kamko ka•enga ineba Chief Minister parakangaha.
Chief Minister-ni ra•gatgipa ‘Support for Producers Group’-ni ning•o sorkari, bading chiwalani kamrangko tang•doatna tangka paisarangko on•e dakchakgen ineba ia tom•anio Sangma aganaha.
Chief Minister-ni aganani gitade, food processing ba cha•anirangko tarianichi game ge•e man•gipa bosturangko tang•doatna gita India sorkarini Food Processing Ministry, Mendipathar-o ‘Mega Food Park’-ko kulina tangka paisarangko chamataha.
Ia Mega Food Park-ko kulianichi Garo Hills-o game ge•e man•gipa bosturangoniko dingtang dingtang cha•anirangko tarina man•gen ineba Chief Minister aganaha.
A•doko game ge•e aro bading chiwale cha•giparangna cholrangko oe on•na man•na gita sorkari, uamangni bosturangko pack ka•na aro bazar antirangona sokatna dakchakgen ineba Chief Minister parakataha.
Ia bilsini gisepo, dol 25000 producer group-rangna CM-ni ‘Support for Producers Group’-ni ning•o tangka paisarangko on•e dakchakanggen aro iani ning•o game ge•e cha•giparang aro bading chiwalgiparang, an•tangtangni kamrangko tang•doatna man•na gita sak 10 donggipa dolrangoni sakpraknan gong 5000/- ka•e on•gen ine Chief Minister parakataha.
Ia jolrango game ge•e cha•gipa, self help group aro bading chiwalgiparangni kamko namdapatna man•na gita ua uamangni neng•nikanirangkoba ia tom•anio knatime ra•angaha.
