Shillong, Nov 4: Shillong songjinmani Demthring gittimo metre 10 chel·aoniko nishan ka·e slai gosusaram nokdringko nokdonggae on·anio a·dokni Skotong Minister Pa. Conard K. Sangma “a·dokni sakanti chadambe an an·tangtangni gisiko nanganiko chu·sokatna cholko man·gen aro ian Sorkarini skani ong·a” ine a·dokni Sports Minister Pa. Banteidor Lyngdoh ni dongpaanio jinmana aganaha.
National Games ko a·dok sokachakna tarisamsoengon ia indakgipa susaanio maidakode a·dokni chadambe rang changgipa sapgipa ong·sogen una miksonge skichakram gita uko bimang ong·ataha ineba aganaha. A·dokni chadamberang kal·susaani a·bao chengtelaigiparang ong·a aro uko silroro namroroatna miksonge Sorkari Youth Policy ko ba ra·gatnasiengaha. Shooting Association of Meghalaya dolko a·doko namgipa kal·susagiparangko ong·katatahani gimin aro re·baenggipa National Games o a·dokni rasongna medal rangko man·na krenge ranta ka·samsoataninaba Pa. Sangma de·mitelangaha.
