Shillong, May 27: Gnigipa changna COVID-19 giprorotaiengani gimin Meghalaya sorkari, Megha Health Insurance Scheme (MHIS)-ni ning•o man•gniko gong 60,000-ona bariatna tik ka•angaha.
“MHIS-ni ning•o man•gniko chinga gong 4,900-oni gong 60,000-ona bariatna tik ka•aha,” ine Bristibar salo, sorkarini tom•a matchotani ja•man a•dokni Deputy Chief Minister Prestone Tynsong parakataha.
MHIS-ni ning•o namgnirangko man•enggipa manderangna ta•raken dakchakanirangko on•na man•na gita sorkari, iako tik ka•angaha ineba Deputy Chief Minister parakataha.
Tynsong-ni u•iatani gitade, da•o dipet MHIS-ni beneficiary-rangko hospital-o admit ka•on gong 4900-ni dakchakanirangko man•engachim indiba da•o ia man•gniko bariatahaode beneficiary-rang bate man•skagnok.
Da•o dipet MHIS-ni ning•o biming segatgiparang 58.5 percent-san gapengkua ineba Tynsong, an•tangni suk ong•gijaniko parakataha.
“A•doko songdongenggipa manderangna MHIS-ni namgniko on•na man•na gita chinga a•doko songdongenggipa pilak manderangkon ia scheme ning•o register ka•china didienga,” ine Tynsong aganaha.
