Shillong, Oct 31: Meghalaya a•doko Mid Day Meal (MDM) worker-rangni dingtang dingtang dabianirangko sal 10-ni gisepo sorkari chu•sokate on•jagenchimode ramarango jingjengatanirangko dakangtaigen ine All Jaintia Mid Day Meal Workers Union (AJMDMWU) aro All Meghalaya Mid Day Meal Workers (AMMMW) mikrakataniko on•angaha.
Sombar salo ia dolgnini MDM worker-rang, Shillong songjinmani Nongthymmai-o donggipa Fire Brigade kal•chakramo tom•e chanchirimangenba, jingjengatanirangko a•bachengtaina tik ka•angaha.
Ia tom•anio dingtang dingtang biaprangoni MDM worker-rang re•bae bakko ra•angtokaha aro uamang baksa MLA Ampareen Lyngdoh-ba bakko ra•angpaahachim.
Union-ni advisor KL Pariat-ni parakatani gitade, Jaintia Hills-ni MDM worker-rangna 2002 bilsionin a•dok sorkarini bakoniko japrako gong 100-kosan dormaha dake on•engachim aro uamang ia man•gnirangkoba jagittamna kingking da•o man•kujaengachim.
Indake ong•engon, MDM worker-rangna japrako on•enggipa gong 100-ni dormahako gong 2000-ona bariatchina aro MDM worker-rangni man•na nangkuenggipa dormaharangko ta•raken on•china gita union dabiangaha.
Skulrango poraienggipa bi•sarangna cha•anirangko song•e on•na gita da•onan Meghalaya a•doko skul damsaba LPG-rangko man•kujaengani gimin LPG-rangko bree jakkalna gita tangka paisarangko on•chinaba MDM worker-rang sorkario dabiengachim ineba Pariat parakataha.
