Shillong, Aug 26: India a•song gimiko mikka wabatsranggipa biap ong•genchimoba Meghalaya a•doko chirangko man•na neng•engahani gimin Sukrobar salo, Meghalaya a•dokni PHE Minister Renikton Tongkhar suk ong•gijaniko parakatenba, chirangko man•jaengmiting somoirango mikka chirangko chimonge rakkienba jakkalchina gita a•doko songdongenggipa manderangko didiataha.
Chiring chibisikrangni tiproroangengahani gimin an•tangni suk ong•gijaniko parakatengon, iandakgipa somoirango manderang mikka chirangko ripinge rakkiskana nangenga ine PHE Minister parakataha.
Sukrobar salo, Shillong songjinmani State Convention Centre-o ong•atanggipa North East Water Conclave-o dongpae bakko ra•angani ja•man, a•dokni PHE Minister, ia kattarangko aganaha.
Chibisikrangko ripinge rakkina gita mai ja•kurangko de•aha ine sing•anina aganchakaniko on•angengon, a•a nokgiparangoniko a•arangko brena man•na gita ma•mong sorkarioniko tangka paisani gita dakchakaniko nangenga ine Tongkhar parakataha.
Manderangni a•arangko brejaskalde songo noko donggipa chibisikrangko sorkari a•kangna bil dongjawa ineba ua aganaha.
Chibisik donggipa biaprango bolrangko ge•china gitaba PHE Minister didiataha.
