Shillong, June 16: Mikka jimbee waanichi adita rama-sorokrang nosto ong•ako man•e neng•nikanirangko chagrongengon iarangko nigrike kam ka•na skotong minister bristibar salo Deputy commissioner-rang aro gipin dilgiparang baksa tom•e chanchigrikdilangaha.
Dontongpilgija mikma waani a•selo a•dokni adita ramarang a•a ruronge aro be•grue nosto ong•atako man•tokaha. Nangchongmotgipa bosturangko salrurana aro re•rurana da•ororo neng•nikaniko man•tokenga. Salgro-salaramni mitam a•dokrangona dakanggipa ramarang nosto ong•atako man•tokaha. Iarangni bidingo nigrike ta•raken kamrangko ka•china skotong minister districtantini DC aro officialrangna ge•etaniko on•angaha. Iana dingtangmancha Regional committeekoba seokangaha, uarangara East Khasi Hills aro Ribhoi Districtko dilna Prestone Tynsong, Jaintia Hillsni districtrangko dilna Lakhmen Rymbui baksana Kyrmen Shyla, South West, West aro Eastern West Khasi Hillsko dilna Renikton Lyngdoh Tongkhar aro Garo Hillsko dilna James Sangma ong•a.
Ia seokgimin minister rang jerangkon districtantiko dilna donmanahachim, uamangko districtni biaprangko re•roroe nirokechina ge•etaniko on•aha. A•dokni manderangna naljokaniko on•a konta 72 ni gisepon name dake chu•soke kam ka•chinaba didianiko on•angaha.
