Shillong, June 16: Bristibar salo dontonggija mikkarang waanganichi, East Jaintia Hills a•jani Lumshnong Police Station-ni ning•o donggipa National Highway (NH-6) ramani mitam bakrang be•wakangaha.
Ia ramani be•wakanganio truck gari bolsa aro gari chongipa bolsaba ga•akonangchapaha indiba mande siani giminde maming koborko man•soa dongjaha.
Mikkarang dontonggija waanganichi ia ramani mitam bakrango a•a ruronganirangkoba nikna man•aha aro uandaken ia rama gita gari gorarangni re•ruraaniko champengataha.
Ia ramao a•arang rurongdapahani gimin ia rama gita songre songrebatjachina manderangko Disrict Disaster Management Authority (DDMA)-ni official-rang didiataha.
A•a rurongdapa man•gipa ramako watpilna ta•raken kamko ka•enga aro ia ramao jachange dongna nangenggipa manderangna pilak nanga dakchakanirangko on•enga ineba DDMA-ni official-rang parakataha.
Koborko on•ani gitade, a•arang rurongdapanichi Lumshnong toll plaza-ba nosto ong•atako man•aha aro ia rama gita Silchar aro gipin biaprangona re•a doanikoba champengataha.
Batanggimin antirangonin Meghalaya a•doko dontonggija mikkarang waengani a•sel, chi bananirangko aro a•a be•anirangko bang•en nikna man•engahachim.
Indake ong•engon, Meghalaya a•dokni Chief Minister Conrad K Sangma-ba video conference gita tom•aniko ong•atangenba, mikkarang waanio neng•nikanirangko man•enggipa manderangna pilak nanga dakchakanirangko on•china gita pilak a•jani deputy commissioner-rangna ge•etaniko on•ataha.
