Mumbai, Feb 6: India a·song gimik-o git ring·ani a·jao mingsing minggamgipa aro mingnamgipa Uphadi jekai Bharat Ratna, Padma Vibhushan, Padma Bhushan aro Dadasaheb Phalke man⋅gipa Ma Lata Mangeshkar February ni 6 tariko Mumbai-ni Breach Candy Hospitalo an⋅tangni ka⋅sagimin nokdangni manderangko aro pilak ripengrangko jringjrotna neng·takna a·gilsakko watangaha. Ma Lata Mageshkar 1929 bilsoo atchiaha aro indake uni chu·gimik janggitangani bilsi 92 ong⋅ahachim. Bilsirang re⋅angan baksa be⋅enni saanirangko man⋅engon, batanggimin January 8 tariko Covid 19 positive man⋅an baksa Pneumonia saaniko sanna hospitalona ra⋅baahachim indake uni saanirangba antisana skangmang aditan namkalbatengachim. Uko ICU-o donani somoio un baksa git ring⋅rimanio mingsinggipa Asha Bhonsle-ba re⋅ange niaha. Uko Ventilator-o dontaion uni saani namjabatna a⋅bachenge robibal pring 8 adha bajimang-o a⋅gilsakko watangaha.
Lata Mangeshkar doka dam⋅anio mingsinggipa Pandit Deenanath Mangeshkar-ni skanggipa demechik ong⋅achim. Uni ba⋅rimarang gimik sak 5 gnangchim. Uni bilsi 13 pition, uni pagipa siangaha aro ua somoirangonin Lata Mangeshkar git ring⋅ani a⋅bakuo gisik ka⋅tong on⋅e kam ka⋅e mingsingako man⋅baaha. Uni ku⋅rangni knatobeanina uko ‘Nightingale of India’ ineba mingsingpilachim.
Uni mingsinggipa gitrangaoni mitamranga, Mahal Film-oni Aayega Aanewala, Baiju Bawra, Mother India aro gipinrang… Ua a⋅songna ring⋅mitelani gitrangko banaie ring⋅gipa ‘Aye Mere Watan Ke Logo’ jekon 1962 bilsi China a⋅song baksa dakgrike sianggipa sipairangna tariachim. Ua uko New Delhi-ni National Stadium-o a⋅songni President Pa S Radhakrishnan aro Prime Minister Pa Jawaharlal Nehru-ni mikkango 1963 bilsi republic Day-o ring⋅aha.
Lata Mangeshkar Hindi film-ni gitrangna agreba joltangni ku⋅sikrangoba jedake Marati aro Bengali ku⋅sikchiba gitrangko ring⋅aha. Ua 1965 bilsio Marati film-ni gitrangna Maharastra a⋅dok sorkarioniko Best Music Director Uphadi-koba ra⋅chakaha.
