Shillong, Aug 19: Meghalaya a•dokni minister-rang aro MLA-rangnaba bobil dake chakatenggipa dolrang, tangka dabiani lekkarangko on•aha ine Bristibar salo, Opposition dolni dilgipa Mukul Sangma matnangataha.
Sangma-ni parakatani gitade, Meghalaya a•doko obostarang namjabatrorona a•bachengtaiengahaoba a•dok sorkari, iani bidingo maming ja•kurangko de•na gisiko nangjaenga.
“Badita sak minister-rang aro MLA-rang tangka dabiani lekkarangko man•soaha na•simang Chief Minister-o sing•sandie nibo, unosa a•doko ong•enggipa obostarangni gimin ma•sigen,” ine Sangma, kobor ra•timgiparangna aganaha.
Meghalaya a•doko iandakgipa obostarang ong•engani gimin ua State Security Commission-ni tom•aniko ong•atchina sorkariko aro mongsongbate Chief Minister-ko didina jotton ka•ahachim ineba Congress dolni dilgipa parakataha.
Meghalaya a•doko bobil dake chakatanina champengatako man•gipa HNLC dol, bading chiwalgiparangna aro politician-rangna ‘income tax’-ni bimingo tangka dabiani lekkarangko on•enga ine adita salrangna skangsan koborrangko on•ahachim.
Mikkangchi obostarang namjabatroroangjana gita a•doko songdongenggipa mande sakantian kamko ka•na nangenga ineba Sangma parakataha.
“Chadamberang dilsretako man•e bobil dake chakatenggipa dolrango napangjana gita an•ching sakantian kamko ka•na nangenga,” ine ua aganaha.
Mande sakantian a•songni niamna kengiparang ong•na nanga ine janapatengon, a•songo songdongenggipa manderang niamna kenjagenchimode ia a•gilsak dongtogipa ong•jawa aro manderang ia a•gilsako janggi tangna man•jawa ine Opposition Congress dolni dilgipa parakataha.
Uni Chief Minister ong•engmiting somoion Congress sorkari, Meghalaya a•doko tom•tomaniko ra•bapilna man•ahachim indiba da•o ia tom•tomani gimaangpilna a•bachengengaha ineba Sangma, NPP-chi dilenggipa MDA sorkariko matnangataha.
