Tura, August 12: Sukrobar salo, Meghalaya a•dokni Skotong Minister Conrad K Sangma, Chief Minister-ni Adviser Thomas A Sangma, Selsella-ni MLA Ferlin CA Sangma, skigiparang aro chatrirangni dongpaanio, Miriam Russel Women’s College-ko oprake on•angaha.
Ia college-ara Garo Hills-o skanggipa me•chikrangni college ong•enga.
Ia Miriam Russel Women’s College-ara Tura Christian Girls’ School-ni bak ong•enga aro ian chatrirangna chubata gadangni lekka poraniko on•na sienga.
Ia college-ko oprakani somoi-o a•dokni Skotong Minister, jinmana aganprakangengon, Tura-ni Christian Girls Higher Secondary School-ara Tura aro Garo Hills-ni manderangna lekka poraniko on•anio mingsing minggamako man•gipa skul ong•e, mikkangchi a•dokni namroro silroroanina nambatgipa chatrirangko ong•katate a•dokna dangdike on•angkugen ine parakangaha.
