Agartala, April 30: Bilsi 24-na skang Mizoram a•dokoni katnapgipa sak 36,140 Tribal-rangko nokchakna gita Tripura sorkari, gong kror 1200-ni scheme-ko ma•mong sorkari baksa nangrime ra•gataha ine Tripura-ni Chief Minister Biplab Kumar Deb parakataha.
Bilsi 24-na skang, Mizoram a•doko jatni gita so•sojengjeng ong•ani a•sel ia tribal-rang Tripura a•dokona katnaptokahachim.
Tripura a•doko ma•brange dongna nangenggipa Reang tribal-rang, jekon joltangchi uamangko ‘Bru’ ineba mingachim, ia tribal-rangna dakchakaniko on•na gita dingtang dingtang a•jani dam 13 biaprangko Tripura sorkari seokmanaha ineba Deb parakataha.
“Bilsi 24-na skang jatni dinggrikanio ma•brangna nanggipa Reang tribal-rangko naljokatna gota Prime Minister Narendra Modi aro Union Home Minister Amit Shah, ia ka•dongbagipa ja•kuko de•chakataha,” ine Tripura-ni Chief Minister parakataha.
Tripura a•doko katnapgipa ia tribal-rangna dakchakanirangko on•na gita gong kror 600 tangkarangko a•songni Prime Minister parakatmanaha ineba Deb aganaha.
Re•anggipa bilsini January jao, Union Home Minister Amit Shah-ni mikkango, Mizoram aro Tripura a•dokni chief secretary baksana MHA-ni Joint Secretary Satyendra Garg aro gipin official-rangni songgigrikanio soi ka•grikani gitade, Reang tribal jatni ge 5400 nokdangrangoni sak 36,140 tribal-rangko Tripura a•dokni dingtang dingtang a•jarango nokchakna nangengachim.
Tripura a•doko katnapgipa Reang tribal-rangko 1997 bilsini October ja dipetan, salgro Tripura-ni ning•o donggipa Kanchanpur aro Panisagar sub-division-ni damsni relief camp-rango donahachim.
