Aizawl, Aug 21: Mizoram a•dokni Indian Medical Association(IMA), doctor saksani kosako kragija dakani kamrangna sonibar salo ba•ra gisimko pote jegalanirangko dakangaha.
Re•anggipa August 17 tarikni CCTV footage-o nikani gitade me•chik saksa doctor saksako uni clinic-o dokaha.
Doctor-ni kosako jak sokgipa me•chik, Mizoram Chief Minister Zoramthanga-ni demechik Milari Chhangte ong•a.
A•selo ga•akgipa doctor, Mizoram Aizawl-ni saksa mingsinggipa Dermatologist Dr. Zonuna ong•a.
Doctor-ni kam ka•chakram biapo kragija dake mande ra•gijani kamko ka•anina Mizoram-ni Indian Medical Association raken jegalaniko dakaha.
Mizoram Protection of Medical Service Personnel and Medical Service Institution (Prevention of Violence and Damage of Loss of Property Act) ainko niamo ra•gatchina sorkarina sedoaniko dake doctor-rang dabianiko dakenga.
A•sel ong•a bakan Chief Minister-ni depante Ramthansiama nogipani kamrangna suk ong•gijaniko parake songdonggipa manderango kema bi•aniko dakaha. A•sel ong•na salsa skang nogipa mikkingo mataniko man•ahani a•selo walgimik tuna man•jae chanchina changjaha aro uandake skin specialist doctor-ko grongna sengknapjaha ine talataniko on•aha.
Mizoram-ni Chief Minister Zoramthanga, kragija a•sel ong•anina songdonggipa manderango kema bi•aha aro mongsongbate Doctor Zonuna aro uni nokdangni manderango kema bi•e lekka seaha.
Chief Minister-ni kema bi•e lekka seanio Indian Medical Association-ni jegalani kamrang ong•a aro ian ra•chakna amgijani ong•ja, doltangna bakrimaniko on•anisa ine janapaha. Uni kosako gittamgipa changna kema bi•na doctor-ni nokona re•angani somoio uamang jiksesako ma•sichakgrikanio noktangona napna on•ahanina mittelataha.
