Aizawl, July 5: Batanggimin jagittam mangoni, African Swine Flu (ASF) ba wakni sabisi sokbaenba Mizoram a·doko jila-alanirangko bang·en nisiatangani ja·man mang 9,000 wakrangko so·ote galtokaha ine koborna parakataha.
Iani bidingo a·dokni Animal Husbandry and Veterinary Science Department-ni see rakkianiko mija Robibar salo parakanggipao, Mizoram a·dokni dam 10 district-rangni ning·o donggipa songrango ba dam 152 songrango ASF ba wakni sabisi giproroaniko nikna gita man·aha, jechin gong kror 36.68 rangni gita namen noksan ong·atako man·aha.
Da·odipet, ia sabisini manggipin wakrango batrikrikdapaniko champengna gita gimik-gimang mang 1,078 wakrangko so·ote galaniko janapatan baksa, wakni sabisi gipkugijagipa biaprangchinikoba mang 699 wakrangni ong·ronggija bewalo sianirangkoba knasoaha, ineba parakataha.
Ia wakni sabisi Mizoram a·doko rang·san giproroani a·sel, a·dokoni wak jile cha·giparang tangka-paisarangni gitaba bang·en noksan ong·aniko man·tokaha.
Indake ong·engon, Bangladesh sima-ari jologipa salgipeng Mizoram-ni Lunglei district-oniko wakni sabisiko man·e sichengani koborko re·anggipa March 21 tariko parakatahachim.
Da·odipet, ia wakni sabisi chong·motan ASF-ko man·eming Lunglei district-o wak mang 3,092, Mamit district-o mang 684, Serchhip district-o mang 939, Lawngtlai district-o mang 320, Khawzawl district-o mang 334, Hnahthial district-o mang 83, Champal district-o mang 257, Saitual district-o mang 8 aro Siaha district-o mang 1 siaha.
