Aizawl, Oct 30: Mingsa dal·begipa a·sel ong·anio, mija Sonibar attamchibara Mizoram a·dokni ning·o donggipa Tuirial Arifield sambajolo petrol toko salangenggipa gariko wa·al kamgopanio komibeoba sakbri manderangni manggisiko man·aha aro unbaksana, bang·a gipinrangba jokkom ong·tokaha ine koborko man·soaha.
Ia a·sel-obostani bidingo joltangoni u·iatani gitade, a·selo saknagipa bang·a manderang aroba sianggiparang, ua somoio wa·al kamenggipa garioni to joke katgipako chimonge ra·na ra·na nanga ga·aka aro mitamrang wa·alko kimitna gita jotton ka·na nanga ga·aka ine agantokaha.
Ja·pangoni u·iatani gita, wa·al kamanichi bolgittam scooty ba bikerangko aro bolsa taxi-koba wa·al kamchapaha. Uandake, ia a·selo sigipa manderang dongkuna gita jajrengsoenga aro a·damoni pilak obostarangkon officialrang aro volunteer-rang da·o nirokatenga, ine officialrang agandapataha.
Ia petrol salangenggipa gariara, Tuirial airstrip sambajolo bolgipin gari baksa chatinggrike a·sel ong·ahachim.
Indake ong·engon, to garini wa·al kamani ja·pangko aro bolgipin gari baksa chatinggrikani ja·pangko da·odipet namedake talkujaenga ineba police-oni u·iataha.
