Shillong, Sept 13: COVID-19 saaniko man·eming tanggitik a·gilsakko watanggipa Mawphlang constituency-ni Independent MLA, Pa Syntar Klas Sunn sagina Sombar salo Meghalaya Assembly-o kalimaniko dakangaha.
Assembly-ni Autumn session-ko a·bachengani gnigipa salo, a·gilsakko watanggipa dilgipako mande ra·na gita uni janggi tangani gimin kan·dike seaniko House-o poraiatani gimin agan-chalaitimgipa Pa Metbah Lyngdoh jinmana u·iatangaha
Pa Sunn sagina kalimani kattarangko aganangengon, House-o jinma tom·bimonganiko dakmiting somoio membor-rangoni ian a·gilsakko wate re·angchenggipa ong·a ine skotong minister Pa Conrad K Sangma parakataha. 
Batanggimin bilsi-gittam atarango Pa Sunn sagini namgipa kamrangko gisik ra·atpile aganangkuanio, House-o sing·anirango, chanchirime tik ka·anio ba jeni gimin jera-ra·grikani ong·oba, chu·gimik ong·e tarisamsoronganio ugitade an·chingoni bang·an dongjawakon…an·tangni sing·enggipana aganchakani uo dongsoronga…, ine Pa Sangma agan-parakataha.
Uni sianggipanichi House gimikna dal·en gimaani ong·aha ine aganengba, Pa Sunn saksa namgipa MLA-san ong·aigija sakantikon pangnan mande ra·ani gisik uno dongrongachim ineba Pa Conrad gisik ra·atjolaha.
Unomiting, warachakgipa dolni dilgipa aro a·dokni skotong minister gitcham Dr. Mukul Sangma-ba una kalimangpaanio, “Uni dongrikenggipa nokdangni manderangna aroba sakanti manderangna mongsongbate uko seoke watatgipa unbaksa bakrimpagiparangna, House-ni dilgipa baksa angni gisik ka·tongchi kalimpaaniko on·a ine aganangaha.
“Kamtango uni on·kangani aro bimchipani namgipa kamrangan a·dokni ma·ambio chapataniko man·na krachongmota aro Pa Sunn-ko chinga gimikan aroba uko seoke watatgiparang pangnajol gisik ra·kamgen ineba Pa Sangma agandapataha.
Batanggimin 2018 bilsio seokako man·e dangike on·baenggiparangna ian namen rasong gribeani ong·a ine dakchakgipa skotong minister Pa Prestone Tynsong-ni wate re·anggipa Pa Sunn-na kalimaniko aganangskaanio, “bilsi-gittam atamangni gisepon an·ching sakbonga memborrangko gimaataha aro ian pangnaba ong·rongkugijagipa skangipa chang ong·enga ine aganangaha. 
Pa Sunn sagi baksa bakroe kam ka·rimbaaniko gisik ra·atpilengon, chief engineer gitchamni a·sel da·alo GSWSS namen chu·sokgipa ong·enga ine aganan baksa, kal·ani a·baoba ua bang·en on·gilangaha aro songsalni gitaba mongsongbate uni a·jatangna ua bang·akon dangdike on·angaha jeni gimin batanggimin 2018 bilsio uko august House-ni memborna manderang seoke watataha, ineba ua dakchakgipa skotong minister aganangkuaha.
Iamang baksana sianggipa Pa Sunn sagini mingnamgipa kamrangko gisik ra·atpile una kalimani kattarangko aganangpagiparangara – Assembly-ni agan-chalaitimgipa gitcham aro Congress dolni a·gipi dilgipa Pa Charles Pynrope, a·dokni Home Minister Pa Lahkmen Rymbui, Rangsakona-ni Congress MLA, Pa Zenith Sangma aro gipin memborrangba wate re·anggipa MLA-na kalimani kattarangko agananga baksa uko mande ra·anikoba dakangjolaha.
