Shillong, Aug 23: Sombar salo, Meghalaya a·dokni Chief Minister Conrad K Sangma, dingtangmancha gama ge·ani kamrangko tang·doatna a·bachengatgipa ‘producers group’ baksa tom·e agangrikangaha aro ia tom·anio ua jinmana aganprakangengon, a·doko game ge·e cha·giparangna aro bading chiwalgiparangna dakchakanirangko on·na man·na gita a·dok sorkari, gong kror 200-ko producers group-na chame donataha ine parakangaha.
Skanggipa bako dingtang dingtang dolrangna gong kror 40-ko on·atchenggen aro ia tangkarangko bakan on·atgnok ineba Chief Minister parakataha.
Producer group-rangna Chief Minister-ni dakchake on·ani bak gita game ge·e cha·giparangna sud grigipa loan-rangko on·na sorkari miksongenga ineba Sangma parakataha.
Game ge·e cha·giparangko ku·cholsan nangrime ba producers group-rango bakko ra·e sorkarini on·enggipa scheme-rangko ra·china gitaba ua didiangaha.
Re·baenggipa September-ni 1 tariko PA Sangma sagini atchiani salko maniani bak gita a·dokni dingtang dingtang biaprango Focus program-ko ong·atanggen aro ia program-ko ong·atanio producer group-rangna tangka paisani gita dakchakanirangko on·angjolgen ineba Chief Minister parakataha.
Mikkang jarango komibeoba sak 30,000 game ge·e cha·giparang ia scheme-ni namgnirangko man·gen ineba ua parakataha.
Ia program-ko Sombar salo, North Garo Hills a·jani Mendal samba jolo donggipa Gokul songo ong·atangaha.
