Tura, Apr 28: Meghalaya a•dokni dam 46 block-na gital building-rangko rikna gita a•dok sorkari, gong kror 121-ko chamataha ine Bristibar salo, Meghalaya a•dokni Chief Minister Conrad K Sangma parakataha.
Bristibar salo, North Garo Hills a•jani Bajengdoba C&RD Block-na gital building-ko rikna gita pangchakaniko songe on•angani somoio ia kattarangko Chief Minister parakataha.
Chief Minister-ni parakatani gitade, Bajengdoba Block-ni gital building-ko matchotahaode officer-rang nambate kamrangko ka•na man•gnok aro ian dingtang dingtang kamrangko ka•anioba dakchakani ong•gnok.
Bajengdoba PHC-ko bakan CHC-ona ra•doatgnok ineba ia tom•anio Chief Minister, jinmana parakataha.
North Garo Hills a•jaona re•angani somoio ua gital tarienggipa Hamilton Sangma Stadium-koba niangjolaha.
Bajengdoba C&RD Block-ni gital building-ko rikna pangchakaniko songe on•angani somoio Meghalaya Assembly-ni Deputy Speaker Timothy D Shira, Bajengdoba-ni MLA Pongseng Marak, Kharkutta-ni MLA Rupert Momin aro gipin dilgiparangba dongpaaha.
