Shillong, Mar 20: Meghalaya a•dokni manderang Hindi ku•sikko agangipa ong•jani gimin Hindi-ko name ma•sigiparang ong•ja aro iako India sorkari ma•sichakna nanga ine Sombar salo, Budget Session-ko a•bachengatanio Governor-ni Hindi ku•sikchi aganprakgipani bidingo a•dokni Cabinet Minister Ampareen Lyngdoh parakataha.
Iani bidingo kobor ra•timgipa manderang baksa agangrikengon, Meghalaya a•doko Hindi ku•sikko agangijagipa aro ma•sigijagiparang dongani gimin India sorkari, manderangni ma•sigipa ku•sikrangko aganna man•gipa governor-rangkosa watatna nanga ine Lyngdoh parakataha.
Meghalaya a•dokni manderang Hindi ku•sikko name ma•sitokjani gimin India sorkarina u•iatna nangchongmota ineba Cabinet Minister aganaha.
Assembly-o Governor-ni Hindi-chi aganprakanggipa bidingo janapatengon, Governor-ni aganprakaniko English-chi see MLA-rangna on•ahaoba mitam MLA-rangde uni agananirangko ma•sitokjaha ine Lyngdoh parakataha.
Iani bidingo ua maini gimin Cabinet-o jegaljaha ine sing•anina aganchakaniko on•angskaengon, Assembly-o ku•sik jakkalanide Cabinet-ni kam ong•ja ine Lyngdoh parakataha.
Khasi aro Garo ku•sikrangko Indian Constitution-ni Eighth Schedule-o chapatna gita nangchongmotenga ineba ua aganaha.
Assembly-o Governor-ni Hindi-chi aganprakaniko jegale, Voice of the People’s Party (VPP)-ni MLA-rang ong•katgrime katahachim ine nikna man•a.
