Tura, Jan 13: Meghalaya a•dokni skanggipa State University, ‘Captain Williamson Sangma State University’-ko Sombar salo, Meghalaya a•dokni Chief Minister Conrad K Sangma, Meghalaya Legislative Assembly-ni Speaker Thomas A Sangma, Deputy Chief Minister Sniawbhalang Dhar, Education Minister Rakkam A Sangma aro Power Minister Abu Taher Mondal-ni dongpaanio, a•bachengate on•angaha.
Ia State University-ko rikna gita gong crore 16.96 koros chamaniko 2018 bilsini June jao ra•chakaha aro ia State University-ni nokrangko 2023 bilsini January jao nokdonggaahachim.
Meghalaya a•doko donggipa technical college-rangko ia State University-ni ning•o bak ong•atna gita ia University-ko Captain Williamson Sangma State Technical University ine 2011 bilsio mingchengahachim indiba ia State University-o technical college-rangkosan ong•aigija pilak college-rangkon bak ong•atna gita ia University-ko Captain Williamson Sangma State University ine a•dok sorkari, 2022 bilsio mingsreskaaha.
Ia Captain Williamson Sangma State University-ko a•bachengate on•anganio a•dokni Chief Minister, jinmana aganprakangengon, ia salko gisik ra•beani sal ine parakatenba, ia university, chubata gadangni bida budirangkosan on•aigija a•doko lekka porani gadangko dingtangatna research-rangkoba dakgen ine aganaha.
Meghalaya a•dokni bilsi 50 gapanio a•doktangni university dongkujachim ine janapatengon, ia state university-ko kulianiara ia sorkarini a•doko lekka porako tang•doatna on•kange kam ka•aniko mesokani ong•aha ine Sangma aganaha.
Ia university-ara bimingmangmangnasan university ong•aijawa indiba Meghalaya a•dokni manderangna ka•dongani, dal•roroani aro arigri cholrangko on•aniba ong•gen ineba Chief Minister aganaha.
Lekka porako on•ani a•bao chagrongna nangenggipa dingtang dingtang ra•bianirangko janapatengon, mikkangchi a•dokni re•mikkanganio, lekka porani nambatroroanikoba nikna man•gen ine Chief Minister, an•tangni ka•dongchakenganiko parakataha.
Captain Williamson Sangma State University-ni Shillong Campus-ko bakan kuligen aro ia campus-an Khasi aro Jaintia Hills a•jani chatro chatrirangna dangdike on•angskagen ineba ia tom•anio Chief Minister parakataha.
Ia University-ni kamrangko da•onin a•bachenggnok aro a•doko donggipa college-rang, ia University-ni ning•o bak ong•na gita dorgastorangko galna man•gnok ine janapatengon, ia state university-o bak ong•enggipa college-ni chatro chatrirangde post graduation aro under-graduation course-rangna Common University Entrance Test (CUET)-ko sena nangjawaha ine Chief Minister talataniko on•angaha.
North Eastern Hill University (NEHU)-o bak ong•kuenggipa college-ni chatro chatrirangde CUET-ko sena nangkugen ine janapatskaengon, a•dokni ning•o donggipa pilak college-rangkon ia State University-ni ning•o bak ong•china Chief Minister didiataha.
Ia tom•anio, a•dokni Education Minister Rakkam A Sangma, Deputy Chief Minister Sniawbhalang Dhar aro Speaker Thomas A Sangma-ba jinmana aganprakangengon, a•doko lekka porani gadangko tang•doatna gita rake kamrangko ka•na nangkuengani gimin janapangaha.
Ia State University-ko a•bachengatanio, Captain Williamson Sangma State University-ni Vice Chancellor Prof Vasanthi Vijayakumar-ba jinmana aganprakengon, Meghalaya a•dokni namroro silroroanina ia university-ni on•gilanio gamchatgipa ong•ani bidingo aganangaha.
Ia salni bako Williamnagar College, Baghmara-ni Captain Williamson Sangma College, Rongjeng Model College, Ampati Degree College, Tura-ni PA Sangma Abong Noga College, Tura-ni Mason Philips Academy, Mirriam Rural Women’s College aro Tura Christian College-rang, Captain Williamson Sangma State University-ni ning•o bak ong•na gita dorgastorangko on•angtokaha.
Na·simang ia video-koba nina man·gen:
Na·simang iakoba poraina man·gen: Ramarango a•sel ong•aniko komiatna Assam-o awareness program-ko ong•ata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
