Shillong, June 17: Meghalaya a•dokoba da•o bilsi 18 batgiparangko tika su•chichatokengahani gimin Bristibar saloba Shillong songjinmani dingtang dingtang tika su•chakgipa biaprango manderangni bang•bee tika su•na riting dakanirangko nikna man•aha.
Dingtang dingtang biaprangoni bang•bea manderangan an•tangtangko ia kenbegnigipa sabisioniko naljokatna gita tika su•chakgipa biaprangona re•bae tika su•e ra•anirangko nikna man•aha. Dongimin niamrango pangchake, ia tika su•chakram biaprango manderang an•tangtangni jakrangko rongtalatna man•na gita sanitiser-rangkoba donaha.
Union Health Ministry-oni u•iatani gitade, COVID-19-ni tikako ra•na gita da•o internet gita bimingrangko segatna nangtela ong•jaha indiba ja•delgimin manderang pilakan an•tangtangni sepangbatgipa centre-rangona re•ange, ua biapon bimingrangko segate tikarangko su•e ra•na man•engaha.
“Tikarangko su•e ra•na gita da•o skang bimingrangko segatchengna nangjawaha indiba bilsi 18 ba una batgipa pilak manderangan sepangbatgipa centre-rangona re•ange, an•tangtangni bimingrangko segatenba tikarangko su•e ra•na man•engaha,” ine Union Health Ministry parakataha.
CoWIN-o Common Service Centre (CSC)-rang gita biming segataniba mingsa chol ong•a aro songadam nokadamrango donggipa manderangko biming segate tikarangko su•na gita ASHA aro uandakgipa health worker-rang kamko ka•enga ineba Ministry-oni parakataha.
