Shillong, Aug 24: Adita salrangna skang Assam sorkari, petrol aro diesel-ni damrangko gital dake taripiltaiahani gimin iano pangchake Meghalaya a•dokoba petrol aro diesel-ni kajinarangko dingtangataha.
Iani bidingo Budbar salo, Meghalaya a•dokni Cabinet Minister James K Sangma, kobor ra•timgiparangna talataniko on•angengon, Assam-o petrol aro diesel-ni damrangko dingtangata changantian Meghalaya sorkariba, petrol aro diesel-ni damrangko apsan ong•e rakkina gita taridapna nangao ga•aka ine parakataha.
Sangma-ni parakatani gitade, da•o dipet petrol-ni kajinara 13.5 % ba litre-prako gong 11 ong•engachim aro ia kajinako 13.5% ba litre-prako gong 12.50-ona ra•doataha.
Da•o dipet diesel-ni kajinara 5% ba litre-prako gong 4 ka•e ong•skaengachim aro ia kajinako da•o 5% ba gong 5.50-ona bariatskaaha ineba Cabinet Minister parakataha.
Da•o Byrnihat-o petrol-ni dam 95.10 ong•engani gimin Assam aro Meghalaya sorkarini gisepo dingtanggrikaniara gong 1.92 ong•gen aro Shillong-o petrol-ni damara gong 96.83 ong•skagnok.
Byrnihat-o diesel-ni dam gong 83.50 ong•skaengon, Shillong-o diesel-ni dam gong 84.72 ong•skaengahani gimin damni dingtanggrikaniara Byrnihat-o gong 1.44 aro Shillong-o 0.44 ong•skaengaha.
