Shillong, April 29: Meghalaya a•doko lekka porani gadangko nambatatna ja•ku de•anio sorkari, sak 1320 LP aro UP skulni skigiparangko ia jani gisepon rakkidapaha.
Meghalaya a•dokni Chief Minister Conrad K Sangma-ni parakatani gitade, kamo rakkiako man•gipa sak 1320 skigiparangan NCTE-ni dongimin niam gita chu•sokgiminrang ong•a aro MTET-ko pass ka•giminrang ong•a.
Skigiparangna kamrangko sualmanahani gimin skigipa saksanchi chalaienggipa skulrang a•doko dongjawaha ineba Chief Minister parakataha.
Skigiparangko seokna gita batanggimin bilsirangonin kamrangko ka•soengahachim aro mikkang antini gisepoba adita skigiparangko kamo rakkikugen ine iana skang, a•dokni Education Minister Lahkmen Rymbui-ba parakataha.
Contract-ni bewalo skigiparangko rakkigipa sorkari LP skulrango bang•en kamrang dongkuenga ine janapatengon, ia skulrango kamrangko namdapatna gita permanent skigiparangko seokna nangenga ine Education Minister parakataha.
Rymbui-ni parakatani gitade, a•doko lekka porani gadangko tang•doatna kam ka•anio sorkari, je skulrangon chatro chatrirang komie, sak 5 ba sak 6 skigiparang dongskaengachim, uandakgipa skulni skigiparangko, chatro chatrirang bang•e skigiparangko nangdapenggipa skulrango donatskana gitaba tik ka•angaha.
A•doko lekka porako tang•doatna gita sorkari, skia man•gipa skigiparangko, skul nokrangko aro syllabus-rangko ra•doatna kam ka•enga ine janapatengon, songadam nokadamrango donggipa sorkari skulrangko songni dilgiparang an•tangtangan nirok sandichina aro kamo donatako man•gipa skigipani kamrangko nirokjringchina Education Minister didiataha.
“Skigiparang class-rangko ra•jaenga ong•ode skigipani kosako ja•kuko de•na man•na gita songni dilgiparangan, official-rangna u•iatna nanga,” ine Rymbui aganaha.
Education department-de manderangna kamrangko on•timgipa dol ong•ja indiba skie on•na gitasa skigiparangko rakkienga ine talatangengon, kamna seokako man•gipa skigiparang, je biapoba donatako man•china kamtango bimchipe class-rangko ra•jringchina ine Education Minister parakataha.
Meghalaya a•doko skigipa saksanchi chalaienggipa skulrang bang•en donga ine janapatengon, iandakgipa skulrango sorkari komibeoba skigipa sakgniko donatgen ine Education Minister parakataha.
Indake ong•engon, ia bilsini MTET porikkana July jaon form-rangko gapatna nanggen aro porikkako ia bilsini August jaon ong•atnaba gnang ine Education Minister parakataha.
