Shillong, Jan 31: Meghalaya Assembly-ni gital nokko re•baenggipa June jani bon•angao matchotgen ine Sombar salo, Meghalaya Legislative Assembly-ni Speaker Metbah Lyngdoh parakataha.
Gital Assembly nokko rikani bidingo ua re•anggipa antio name nipilangaha ineba Lyngdoh parakataha.
Assembly Speaker-ni parakatani gitade, ia gital Assembly nokko June jao matchotahaode July jagimik testing aro commissioning-ko dakenba, July ja bon•angachibarade ia gital Assembly nokko jakkalna man•gnok.
COVID-ni a•sel batanggimin bilsignini gisepo ia nokko rikanio ja•manchakatako man•na nangaha ine talatangengon, ia bilsioba COVID giprorobataiengahaoba kamko June jaode matchotatna man•gnok ine Lyngdoh parakataha.
Shillong songjinmani Mawdiangdiang-o gong kror 127 ong•gipa Meghalaya a•dokni gital Assembly nokko 2019 bilsini June 15 tarikon Uttar Pradesh a•dokoni Rajkiya Nirman Nigam Limited company, rikna a•bachengahachim.
Meghalaya a•dokni dingtang dingtang sorkarirang, Assembly-ni gital building-ko rikna gita dingtang dingtang biaprang jekai Police Bazar, Mawdiangdiang, Upper Shillong aro Tara Ghar-ko minge donahaoba da•o ia building-ko Mawdiangdiang-o rikskaengahachim.
