Shillong, March 12: A·songni jakgitel man·aniko gisik ra·e manianirangko dakenggipa programni bak gita, India a·songo songdongenggipa gimik jatrangni gisepo mikneng-mikbugija, maming kajia-golmalrang gri janggi tangrimani gimin aro a·songtangna ka·saani gimin manderangna ma·siate on·na gita miksonganiko done mija Sonibar salo Meghalaya a·dokni skotong Shillong-ni Ward’s Lake-o “Azadi Ka Amrit Mahotsav”-ko manianggipao Meghalaya BSF-ni Brass Band ba dokgipa-damgipa dolrang, manderangna ga·subee dakmesokangaha.

BSF band memborrangni dingtangmancha dokna-damna sapanirangchi aro a·songna ring·mittelani mingsinggipa gitni sulrangchi doka-damanirangko dakange unsalo Ward’s Lake-ona biap nina-rona re·bagipa manderangko an·saoatangan baksa a·songtangna ka·saani giminba manderangko gisik ra·atangjolaha.