Shillong, Aug 23: Mongolbar salo, Meghalaya a•dokni Chief Minister Conrad K Sangma, West Jaintia Hills a•jani Mukhla-o manianggipa Behdeinkhlam-o dongpae bakko ra•angaha.
Ia manianio a•dokni Chief Minister, jolni manderangna an•tangni nama skaniko parakangengon, batanggimin bilsignina sajinmani a•sel Bendeinkhlam manianiko ong•atna man•jahaoba da•alo ia manianio dongpae bakko ra•pana man•ahani gimin katchabeaha ine parakangaha.
A•dokni daka rikani, bebera•ani aro jatrangko manigipao ong•pana man•aniara namen katchabeani somoi ong•a ine janapatengon, dingtang dingtang program aro scheme-rangko ra•gatanichi ia sorkari, a•dokni daka rikani aro man•rikrikbaenggipa gunko tang•doatna aro dakchake on•na jotton ka•enga ine Chief Minister parakataha.
Mikkangchi Behdeinkhlam manianiko nambate dakangna man•na gita Mukhla-ni Sein Raid-o donggipa biaprangko taridapna gita pilak nanga dakchakanirangko on•na gitaba Chief Minister ku•rachakangaha.
